ബംഗ്ലാദേശിന്റെ ഇന്ത്യന്‍ പര്യടനത്തിലെ ടി-20 പരമ്പര ആരംഭിച്ചിരിക്കുകയാണ്. രണ്ട് മത്സരങ്ങളുടെ ടെസ്റ്റ് പരമ്പരയില്‍ രണ്ടും പരാജയപ്പെട്ട ബംഗ്ലാദേശ് ടി-20 പരമ്പര വിജയിക്കാനുറച്ചാണ് കളത്തിലിറങ്ങിയിരിക്കുന്നത്. വിജയം മാത്രമാണ് തങ്ങള്‍ ആഗ്രഹിക്കുന്നതെന്ന് ബംഗ്ലാ നായകന്‍ നജ്മുല്‍ ഹൊസൈന്‍ ഷാന്റോ നേരത്തെ തന്നെ പറഞ്ഞിരുന്നു.
ഗ്വാളിയോറിലാണ് പരമ്പരയിലെ ആദ്യ മത്സരം അരങ്ങേറുന്നത്. ടോസ് നേടിയ ഇന്ത്യന്‍ നായകന്‍ സൂര്യകുമാര്‍ യാദവ് എതിരാളികളെ ബാറ്റിങ്ങിനയച്ചു.
സാഹചര്യങ്ങള്‍ അല്‍പം ഈര്‍പ്പമുള്ളതാണെന്നും മത്സരം പുരോഗമിക്കവെ കാര്യമായ മാറ്റമുണ്ടാകില്ലെന്നും വ്യക്തമാക്കിയാണ് ഇന്ത്യന്‍ നായകന്‍ ഫീല്‍ഡിങ് തെരഞ്ഞെടുത്തത്. സ്വന്തം കാണികള്‍ക്ക് മുമ്പില്‍ കളിക്കുന്നത് എല്ലായ്‌പ്പോഴും സന്തോഷം നല്‍കുന്നതാണെന്നും ടോസ് വിജയിച്ച ശേഷം സ്‌കൈ പറഞ്ഞു.
മികച്ച സ്‌ക്വാഡാണ് ഇന്ത്യക്കുള്ളതെന്നും ഇതില്‍ നിന്നും 11 പേരെ തെരഞ്ഞെടുക്കുന്നത് ഏറെ ബുദ്ധിമുട്ടാണെന്നും പ്ലെയിങ് ഇലവനെ കുറിച്ചുള്ള ചോദ്യത്തിന് ഇന്ത്യന്‍ നായകന്‍ മറുപടി നല്‍കി. തിലക് വര്‍മ, ഹര്‍ഷിത് റാണ, ജിതേഷ് ശര്‍മ, രവി ബിഷ്‌ണോയ് എന്നിവരെ പുറത്തിരുത്തിയാണ് ഇന്ത്യ ആദ്യ മത്സരത്തിനിറങ്ങുന്നത്.
അതേസമയം, മത്സരം മൂന്ന് ഓവര്‍ പിന്നിടുമ്പോള്‍ 16 റണ്‍സിന് രണ്ട് വിക്കറ്റ് എന്ന നിലയിലാണ് ബംഗ്ലാദേശ്. ആദ്യ ഓവറില്‍ ലിട്ടണ്‍ ദാസിനെ നഷ്ടപ്പെട്ട ബംഗ്ലാദേശിന് മൂന്നാം ഓവലറിലെ ആദ്യ പന്തില്‍ രണ്ടാം ഓപ്പണര്‍ പര്‍വേസ് ഹൊസൈന്‍ എമോണിനെയും നഷ്ടമായി. അര്‍ഷ്ദീപ് സിങ്ങാണ് രണ്ട് വിക്കറ്റും നേടിയത്.
Two early wickets for Arshdeep Singh and #TeamIndia! ⚡️⚡️
