പാര്‍ട്ടി പുനസംഘടന പ്രഖ്യാപിച്ച് ഇമ്രാന്‍ ഖാന്‍; പൊതു തെരഞ്ഞെടുപ്പ് നേരിടാന്‍ പി.ടി.ഐയെ ഒരുക്കുക ലക്ഷ്യം

ഇസ്‌ലാമാബാദ്: പാര്‍ട്ടി പുനസംഘടന പ്രഖ്യാപിച്ച് പാകിസ്ഥാന്‍ മുന്‍ പ്രധാനമന്ത്രി ഇമ്രാന്‍ ഖാന്‍. തന്റെ പാകിസ്ഥാന്‍ തെഹരീക് ഇ ഇന്‍സാഫ് (പി.ടി.ഐ) പാര്‍ട്ടി പുനസംഘടിപ്പിക്കുമെന്നാണ് ഇമ്രാന്‍ ഖാന്‍ പ്രഖ്യാപിച്ചത്.

വരാനിരിക്കുന്ന പാകിസ്ഥാന്‍ പൊതുതെരഞ്ഞെടുപ്പ് മുന്നില്‍കണ്ടാണ് പാര്‍ട്ടി പുനസംഘടിപ്പിക്കാന്‍ ചെയര്‍മാന്‍ കൂടിയായ ഇമ്രാന്‍ ഖാന്റെ തീരുമാനം.

പുനസംഘടന സംബന്ധിച്ച കാര്യങ്ങള്‍ ചര്‍ച്ച ചെയ്യുന്നതിനായി പഞ്ചാബ് പ്രവിശ്യയിലെ പാകിസ്ഥാന്‍ പ്രൊവിന്‍ഷ്യല്‍ അസംബ്ലി അംഗങ്ങളുടെ (എം.പി.എ) ഒരു യോഗം ഇമ്രാന്‍ ഖാന്റെ നേതൃത്വത്തില്‍ ചേര്‍ന്നിരുന്നു. ഞായറാഴ്ചയായിരുന്നു യോഗം.

വരാനിരിക്കുന്ന തെരഞ്ഞെടുപ്പിന് തയാറെടുക്കാന്‍ യോഗത്തില്‍ അദ്ദേഹം അംഗങ്ങളോട് ആഹ്വാനം ചെയ്തു. പഞ്ചാബ് മുഖ്യമന്ത്രി ചൗധരി പര്‍വേസ് ഇലാഹി, മുന്‍ ഫെഡറല്‍ മിനിസ്റ്റര്‍ മൂനിസ് ഇലാഹി എന്നിവരുമായും ഇമ്രാന്‍ ഖാന്‍ വിഷയത്തില്‍ ചര്‍ച്ച നടത്തി.

റിപ്പോര്‍ട്ട് പ്രകാരം പ്രൊവിന്‍ഷ്യല്‍ കാബിനറ്റ് രൂപീകരണം സംബന്ധിച്ചാണ് ഇവര്‍ ചര്‍ച്ച നടത്തിയത്.

നേരത്തെ പഞ്ചാബ് പ്രവിശ്യയില്‍ നടന്ന ഉപതെരഞ്ഞെടുപ്പില്‍ ഇമ്രാന്‍ ഖാന്റെ പി.ടി.ഐ വന്‍ വിജയമായിരുന്നു നേടിയത്. ഷെഹബാസ് ഷെരീഫിന്റെ പി.എം.എല്‍.എന്നിനെ വലിയ മാര്‍ജിനിലായിരുന്നു പി.ടി.ഐ പരാജയപ്പെടുത്തിയത്.

20 സീറ്റുകളുള്ള പഞ്ചാബ് അസംബ്ലിയിലേക്ക് നടന്ന തെരഞ്ഞെടുപ്പില്‍ പി.ടി.ഐക്ക് 15 സീറ്റുകള്‍ ലഭിച്ചപ്പോള്‍ പി.എം.എല്‍- എന്നിന് വെറും നാല് സീറ്റുകള്‍ മാത്രമാണ് നേടാനായത്.

പാകിസ്ഥാന്‍ രാഷ്ട്രീയത്തില്‍ നിര്‍ണായക പ്രധാന്യമുള്ള അസംബ്ലിയാണ് പഞ്ചാബിലേത്. തുടര്‍ച്ചയായി പി.എം.എല്‍- എന്‍ വിജയിച്ചിരുന്ന പ്രവിശ്യ കൂടിയായിരുന്നു പഞ്ചാബ്.

വിജയത്തിന് പിന്നാലെയായിരുന്നു പാര്‍ലമെന്റിലേക്കുള്ള പൊതു തെരഞ്ഞെടുപ്പ് നേരത്തേ നടത്തണമെന്ന ആവശ്യവുമായി ഇമ്രാന്‍ ഖാന്‍ രംഗത്തെത്തിയത്.

2023 ഒക്ടോബറിലാണ് പാകിസ്ഥാനില്‍ അടുത്ത പാര്‍ലമെന്റ് തെരഞ്ഞെടുപ്പ് നടക്കുക. എന്നാല്‍ തെരഞ്ഞെടുപ്പ് അതിന് മുമ്പേ തന്നെ നടത്തണമെന്നാണ് ഇമ്രാന്റെ ആവശ്യം.

Content Highlight: Imran Khan announces Pakistan Tehreek-e-Insaf party reorganization, eyes on upcoming general elections