'ജനുവിനായുള്ള പെണ്‍പിള്ളേര്‍ തേക്കുമ്പോള്‍ ലോജിക് കാണും'

അഖില്‍ സത്യന്റെ സംവിധാനത്തില്‍ ഫഹദ് ഫാസില്‍ നായകനായ പാച്ചുവും അത്ഭുത വിളക്കും തിയേറ്ററുകളില്‍ എത്തിയിരിക്കുകയാണ്. ഒരു ഫീല്‍ ഗുഡ് എന്റര്‍ടെയ്‌നറായി എത്തിയ ചിത്രം മികച്ച അഭിപ്രായങ്ങളാണ് പ്രേക്ഷകരില്‍ നിന്നും നേടുന്നത്.

ബോംബെയില്‍ ഫാര്‍മസി നടത്തുന്ന പ്രശാന്ത് എന്ന യുവാവിന്റെ ജീവിതത്തിലേക്ക് ലേല എന്ന പ്രായമായ സ്ത്രീ കടന്നുവരുന്നതും തുടര്‍ന്ന് നടക്കുന്ന അപ്രതീക്ഷിത സംഭവ വികാസങ്ങളുമാണ് ചിത്രത്തെ മുന്നോട്ട് നയിക്കുന്നത്.

ഇതിനൊപ്പം ടോക്‌സിക് റിലേഷന്‍ഷിപ്പുകളെ പറ്റിയും ചിത്രത്തില്‍ പറയുന്നുണ്ട്. ചില ‘ആണ്‍ ബോധ്യങ്ങള്‍’ കാരണം പ്രണയത്തില്‍ പരാജയപ്പെട്ടു പോയ ഭൂരിപക്ഷം വരുന്ന ചെറുപ്പക്കാരുടെ പ്രതിനിധിയാണ് പ്രശാന്ത്. കാമുകിയുടെ പേഴ്‌സണല്‍ സ്‌പേസിലേക്കും വ്യക്തിപരമായ ഇഷ്ടങ്ങളിലേക്കും സുഹൃദ് ബന്ധങ്ങളിലേക്കും കൈ കടത്താന്‍ ശ്രമിച്ചതാണ് അയാള്‍ക്ക് പറ്റിയ തെറ്റ്. ഉള്ളിലെവിടെയോ തന്റെ തെറ്റാണെന്ന തിരിച്ചറിവ് പ്രശാന്തിനുണ്ട്. എന്നാല്‍ അയാളിലെ ടോക്‌സിക്കായ ആണ്‍ ബോധം അത് സമ്മതിച്ച് കൊടുക്കാന്‍ തയാറാവുന്നില്ല.

അയാള്‍ക്ക് ഒപ്പമുള്ള സുഹൃത്തിനോട് കാമുകി ചെയ്ത വളരെ ഗുരുതരമായ തെറ്റുകളായി വിവരിക്കുന്നത് അവര്‍ മുടി മുറിച്ചതും, സ്ലീവ്‌ലെസ് വസ്ത്രം ധരിച്ചതും ആണ്‍ സുഹൃത്തുക്കള്‍ക്കൊപ്പം സമയം ചെലവഴിച്ചതുമാണ്. ‘അതിനിപ്പോള്‍ എന്താ’ എന്ന ചോദ്യത്തിലൂടെ കൂട്ടുകാരന്‍ അതിനെല്ലാം ഒറ്റ വാക്കില്‍ മറുപടി കൊടുക്കുന്നുണ്ട്. ‘ജനുവിനായുള്ള പെണ്‍പിള്ളേര്‍ തേക്കുമ്പോള്‍ ലോജിക് കാണും,’ എന്നുകൂടി കൂട്ടുകാരന്‍ ഇതിനൊപ്പം ചേര്‍ക്കുന്നുണ്ട്.

നാളുകള്‍ക്ക് ശേഷം തന്നിലെ പഴയ ടോക്‌സിക് കാമുകനെ മറ്റൊരു ആണില്‍ കാണുമ്പോഴും ഒരു നോ പറഞ്ഞ് അവനെ നന്നാക്കാനാണ് പ്രശാന്ത് കൂട്ടുകാരിക്ക് നല്‍കുന്ന ഉപദേശം.

റിലേഷന്‍ഷിപ്പില്‍ പാലിക്കേണ്ട പരസ്പര ബഹുമാനത്തിന്റേയും വ്യക്തി സ്വാതന്ത്ര്യത്തിന്റെയും പ്രാധാന്യം കൂടി പാച്ചുവും അത്ഭുതവിളക്കും പറഞ്ഞുവെക്കുന്നുണ്ട്.

Content Highlight: Importance of mutual respect and personal independence in relationships