ന്യൂദല്‍ഹി: 10 വര്‍ഷം മുന്‍പ് ബി.ജെ.പി നേതാവിനെതിരെ നടപടിയെടുത്ത ഐ.എഫ്.എസ് ഉദ്യോഗസ്ഥനെതിരെ മോദിസര്‍ക്കാരിന്റെ പ്രതികാര നടപടി. കര്‍ണാടകത്തിലെ ഖനിഭീമനായ ബി.ജെ.പി നേതാവും ആന്ധ്രാപ്രദേശിലെ വൈ.എസ്.ആര്‍ സര്‍ക്കാരും തമ്മിലുള്ള അവിശുദ്ധ ബന്ധം വെളിച്ചത്തുകൊണ്ടുവന്ന ഐ.എഫ്.എസ് ഉദ്യോഗസ്ഥനാണ് കേന്ദ്രം ഇപ്പോള്‍ നിര്‍ബന്ധിത വിരമിക്കല്‍ നല്‍കിയിരിക്കുന്നത്.
ആന്ധ്രാപ്രദേശ് കേഡറിലെ 1991 ബാച്ച് ഉദ്യോഗസ്ഥനായ കല്ലോല്‍ ബിശ്വാസിനാണ് ബി.ജെ.പിയുടെ പ്രതികാരനടപടിയേല്‍ക്കേണ്ടിവന്നത്. മുന്‍ ചീഫ് സെക്രട്ടറി ദിനേഷ് കുമാര്‍ അധ്യക്ഷനായ സമിതി ഒരുവര്‍ഷം മുന്‍പ് നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് നടപടി.
ആന്ധ്രയിലെ അനന്തപുരില്‍ ഡി.എഫ്.ഒ ആയിരിക്കെ റെഡ്ഢിമാരുടെ ഒബുലപുരം ഖനനക്കമ്പനിയുമായി (ഒ.എം.സി) ബന്ധപ്പെട്ട കേസ് കൈകാര്യം ചെയ്യവെ ബിശ്വാസ് നിയമം ലംഘിച്ചുവെന്ന കണ്ടെത്തലായിരുന്നു സമിതിയുടെ ഭാഗത്തുനിന്നുണ്ടായത്.
കര്‍ണാടകത്തിലെ ബെല്ലാരിയിലുള്ള ബി.ജെ.പി നേതാവ് ഗലി ജനാര്‍ദ്ദന്‍ റെഡ്ഢിയും വൈ.എസ്.ആര്‍ സര്‍ക്കാരും തമ്മിലുള്ള ബന്ധം അന്വേഷിച്ച ബിശ്വാസ്, റെഡ്ഢിയുടെ ചില അഴിമതികള്‍ കണ്ടെത്തുകയും ശേഷം കേസ് സി.ബി.ഐക്കു കൈമാറുകയും ചെയ്തു.
