ഹൈക്കോടതി ഉത്തരവിന്റെ പശ്ചാത്തലത്തില്‍ കേരളാ ബ്ലാസ്റ്റേഴ്സ് ടീം സഞ്ചരിക്കുന്ന ബസിന്റെ നിറവും മാറ്റണമെന്ന് മോട്ടോര്‍ വാഹന വകുപ്പ് കഴിഞ്ഞ ദിവസം നിര്‍ദേശം നല്‍കിയിരുന്നു. ഇതിനെതിരെ രംഗത്തെത്തിയിരിക്കുകയാണ് ബ്ലാസ്റ്റേഴ്സ് ആരാധകര്‍.
ബസിന്റെ കളറാണ് അപകടത്തിന് കാരണമാകുന്നതെന്ന് പറയുന്നത് തെറ്റാണെന്നും, എന്തെങ്കിലും അപകടം ഉണ്ടാകുമ്പോഴുള്ള ഇത്തരം നടപടികള്‍ പ്രഹസനമാണെന്നുമാണ് ആരാധകര്‍ പറയുന്നത്.
ഇന്ത്യയിലെ വേറെ എല്ലാ ക്ലബ്ബുകള്‍ക്കും സ്വന്തം ജേഴ്സിയുടെ കളറുള്ള ബസില്‍ പോകുമ്പോള്‍ ഇവിടെ മാത്രമാണ് ഇത്തരം പ്രശ്‌നങ്ങളുള്ളെന്നും വിദേശ താരങ്ങള്‍ അടക്കമുള്ളവര്‍ നമ്മുടെ നാടിനെ തെറ്റായി വിലയിരുത്തുന്നതിന് ഈ നടപടി കാരണമാകുമെന്നും ഒരു ആരാധകരന്‍ പറഞ്ഞു.
അതിനിടയില്‍ ഖത്തര്‍ ലോകകപ്പിനായി പുറത്തിറക്കിയ വാഹനങ്ങളുടെ ചിത്രങ്ങള്‍ ഇതുമായി ബന്ധപ്പെടുത്തി പ്രചരിപ്പിച്ചും ആരാധകര്‍ ട്രോളുന്നുണ്ട്.
#Roadto2022 #Qatar2022 #TournamentTransport #Mowasalat #Karwa #Doha #Qatar #NowisAll pic.twitter.com/vdrWgpcnbu
— Mowasalat Qatar (@Mowasalat_QAT) September 21, 2022
ഫിഫ ലോകകപ്പിന്റെ വലിയ പരസ്യ ചിത്രങ്ങളടങ്ങിയ ബസുകള്‍ കഴിഞ്ഞ സെപ്റ്റംബറില്‍ ഖത്തര്‍ പുറത്തിറക്കിയിരുന്നു. ഈ ചിത്രങ്ങള്‍ വെച്ചാണിപ്പോള്‍ ട്രോളുണ്ടാക്കുന്നത്. എം.വി.ഡിക്ക് ഖത്തറില്‍ ജോലി കിട്ടിയാല്‍ ചാകരയാകുമെന്നാണ് ഒരാള്‍ ഇത്തരം കളര്‍ഫുള്‍ ബസുകളുടെ ചിത്രം പോസ്റ്റ് ചെയ്ത് ഫേസ്ബുക്കില്‍ കുറിച്ചത്.
