“കേരളത്തില്‍ ചൈനീസ് വെള്ളത്തിന്റെ ഉപയോഗവും വിതരണവും വ്യാപകമാവുന്നതായി റിപ്പോര്‍ട്ട് ” എന്ന തലക്കെട്ടില്‍ ട്രോള്‍ വാര്‍ത്തയാണ് മാധ്യമങ്ങളെ കളിയാക്കി ഐ.സി.യു നല്‍കിയിരിക്കുന്നത്. ഐ.സി.യു ഇന്‍വെസ്റ്റിഗേഷന്‍ എന്ന ടാഗ് ലൈനോടെയാണ് ട്രോള്‍ വാര്‍ത്തയുള്ളത്.
കോഴിക്കോട്: ചൈനീസ് മുട്ടകള്‍ കേരള വിപണിയില്‍ വില്‍പ്പനയ്‌ക്കെന്ന വാര്‍ത്ത കഴിഞ്ഞ ഏതാനും ദിവസങ്ങളായി മാധ്യമങ്ങളില്‍ പ്രചരിച്ചിരുന്നു. വാര്‍ത്ത കേട്ട് മലയാളികള്‍ ഒന്നടങ്കം ഞെട്ടി.
ചിലര്‍ മുട്ട തന്നെ ഭക്ഷണത്തില്‍ നിന്നും ഒഴിവാക്കി. മറ്റു സ്ഥലങ്ങളില്‍ മുട്ട ലോഡുമായി എത്തിയ ലോറികള്‍ നാട്ടുകാര്‍ തടയുകയും ലോറി ജീവനക്കാര്‍ ജീവനും കൊണ്ടോടുകയും ചെയ്ത സംഭവവുമുണ്ടായി. ഇതോടെ സംസ്ഥാന ആരോഗ്യ വകുപ്പ് ഇടപെട്ട് ലാബില്‍ പരിശോധന നടത്തിയപ്പോള്‍ ആദ്യം ഞെട്ടിയത് ഇതേ മാധ്യമങ്ങളായിരുന്നു.
ചൈനീസ് മുട്ട എന്നൊന്ന് ഇല്ലെന്നും, കാലാവസ്ഥാ വ്യതിയാനം മൂലം വ്യത്യാസം സംഭവിച്ച മുട്ടകളാണ് ചെനീസ് മുട്ട എന്ന രീതിയില്‍ പ്രചരിച്ചിരുന്നതെന്നും ശാസ്ത്രീയ പരിശോധനയില്‍ വ്യക്തമായി.
ശേഷം വാര്‍ത്ത നല്‍കി വെട്ടിലായ മാധ്യമങ്ങള്‍ക്ക് കിടിലന്‍ മറുപടികളാണ് സോഷ്യല്‍ മീഡിയ നല്‍കിയത്. ഇപ്പോഴിതാ തെറ്റായ വാര്‍ത്ത പ്രചരിപ്പിച്ച മാധ്യമങ്ങളെ ട്രോളി ട്രോള്‍ ഗ്രൂപ്പായ ഐ.സി.യു രംഗത്തെത്തിയിരിക്കുകയായാണ്. “കേരളത്തില്‍ ചൈനീസ് വെള്ളത്തിന്റെ ഉപയോഗവും വിതരണവും വ്യാപകമാവുന്നതായി റിപ്പോര്‍ട്ട് ” എന്ന തലക്കെട്ടില്‍ ട്രോള്‍ വാര്‍ത്തയാണ് മാധ്യമങ്ങളെ കളിയാക്കി ഐ.സി.യു നല്‍കിയിരിക്കുന്നത്. ഐ.സി.യു ഇന്‍വെസ്റ്റിഗേഷന്‍ എന്ന ടാഗ് ലൈനോടെയാണ് ട്രോള്‍ വാര്‍ത്തയുള്ളത്.
റോക്കറ്റ് ഇന്ധനമായി ഉപയോഗിക്കുന്ന മാരക ജ്വലന ശേഷിയുള്ള ഹൈഡ്രജനും കാഠിന്യമേറിയ ലോഹമായ ഇരുമ്പിനെ വരെ തുരുമ്പ് പൊടിയാക്കാന്‍ ശക്തിയുള്ള അതിമാരക രാസവസ്തുവായ ഓക്‌സിജനും ചേര്‍ത്ത് കൃത്രിമമായി ആയിരിക്കാം ലബോറട്ടറികളില്‍ ചൈനീസ് വെള്ളം നിര്‍മ്മിക്കുന്നത് എന്ന് പയ്യന്നൂരിലെ മാതാ ട്യൂഷന്‍ സെന്ററിലെ ബയോളജി മേധാവി ലൈനേഷ് കുമാര്‍ അഭിപ്രായപ്പെട്ടു, തുടങ്ങി രസകരമായ വരികളും വാര്‍ത്തയിലുണ്ട്.
വാര്‍ത്ത വായിക്കാം
കേരളത്തില്‍ ചൈനീസ് വെള്ളത്തിന്റെ ഉപയോഗവും വിതരണവും വ്യാപകമാവുന്നതായി റിപ്പോര്‍ട്ട്
കൃത്രിമമായി ചൈനയില്‍ നിര്‍മിക്കുന്ന വെള്ളം കേരളത്തില്‍ വ്യാപകമായി വിറ്റയിക്കപ്പെടുന്നതായി വിവിധ കേന്ദ്രങ്ങളില്‍ നിന്ന് റിപ്പോര്‍ട്ട്. കണ്ടാല്‍ പെട്ടെന്ന് തിരിച്ചറിയാത്ത ചൈനീസ് വെള്ളം നിറത്തിലോ മണത്തിലോ കാര്യമായ വത്യാസം ഇല്ലാതെയാണ് വിപണിയില്‍ എത്തിക്കുന്നത്. കൂടാതെ കോളകളിലും കുപ്പിവെള്ളങ്ങളിലും എല്ലാം തന്നെ ചൈനീസ് വെള്ളം കടന്നു വന്നതായി സംശയം ഉണ്ട്.
റോക്കറ്റ് ഇന്ധനമായി ഉപയോഗിക്കുന്ന മാരക ജ്വലന ശേഷിയുള്ള ഹൈഡ്രജനും കാഠിന്യമേറിയ ലോഹമായ ഇരുമ്പിനെ വരെ തുരുമ്പ് പൊടിയാക്കാന്‍ ശക്തിയുള്ള അതിമാരക രാസവസ്തുവായ ഓക്‌സിജനും ചേര്‍ത്ത് കൃത്രിമമായി ആയിരിക്കാം ലബോറട്ടറികളില്‍ ചൈനീസ് വെള്ളം നിര്‍മിക്കുന്നത് എന്ന് പയ്യന്നൂരിലെ മാതാ ടൂഷന്‍ സെന്ററിലെ ബയോളജി മേധാവി ലൈനേഷ് കുമാര്‍ അഭിപ്രായപ്പെട്ടു. ഓട്ടോ ഡ്രൈവറായ പി. സുമേഷ് ദാഹിച്ചപ്പോള്‍ ബത്തേരിയിലെ കടയില്‍ നിന്ന് കുപ്പി വെള്ളം വാങ്ങിച്ചപ്പോള്‍ വെള്ളം തൊണ്ടയില്‍ ഒരു പാട പോലെ കിടന്നതായും താഴോട്ടു ഇറക്കാന്‍ ബുദ്ധിമുട്ടുണ്ടായതായും അറിയിച്ചു. ഈ വെള്ളം വീട്ടില്‍ വളര്‍ത്തുന്ന പട്ടിക്ക് കൊടുത്തപ്പോള്‍ പട്ടി കുടിക്കാന്‍ കൂട്ടാക്കിയില്ലത്രേ. വെള്ളത്തിനു പ്ലാസ്റ്റിക്കിന്റെ മണവും ചുവയും ആയിരുന്നു എന്നും പറയുന്നു. ഈ വെള്ളം എത്രകാലം വേണമെങ്കിലും കേടു കൂടാതെ സൂക്ഷിച്ച് വെക്കാമത്രേ.
കുപ്പിവെള്ളത്തിലും കോളയിലും മാത്രമല്ല കേരളത്തിലെ നദികളിലും കുളങ്ങളിലും വരെ ചൈനീസ് വെള്ളം കലരുന്നുണ്ട് എന്ന് സംശയിക്കേണ്ടിയിരിക്കുന്നു കേരളത്തിലെ മഴമേഘങ്ങളെ സാറ്റലൈറ്റ് ഉപയോഗിച്ച് ചൈനയിലേക്ക് കടത്തിക്കൊണ്ട് പോയി പകരം കൃത്രിമമായി നിര്‍മിച്ച ചൈനീസ് മേഘങ്ങളെ ഇവിടെ വിന്യസിച്ചാവാം ഇങ്ങനെ ചെയ്യുന്നത് എന്ന് പ്രകൃതിചികിത്സാ ശാസ്തജ്ഞന്‍ ഡോക്ടര്‍ തെക്കുംചേരി അഭിപ്രായപ്പെടുന്നു. ഇങ്ങനെയുള്ള ചൈനീസ് മേഘങ്ങളെ തിരിച്ചറിയാന്‍ ഇന്ന് നമ്മുടെ കയ്യില്‍ സാങ്കേതിക വിദ്യകള്‍ ഒന്നും തന്നെ ഇല്ല എങ്കിലും മേഘങ്ങളുടെ ലക്ഷണം നോക്കി ഇത് ഗണിച്ച് കണ്ടു പിടിക്കാന്‍ കഴിയും എന്നും അതിനുള്ള വിദ്യ പ്രാചീന മുനിമാര്‍ വികസിപ്പിച്ചിട്ടുണ്ട് എന്നും ആര്‍ഷഭാരത സാംസ്‌കാരിക ശാസ്ത്രഗവേഷകന്‍ കുട്ടികൃഷ്ണന്‍ (പ്രഫസര്‍ കുക്രി) പറയുന്നു.
ചൈനീസ് വെള്ളം കുടിച്ചാണ് നമ്മുടെ നാട്ട്ടില്‍ കാന്‍സര്‍ സര്‍വ്വവ്യാപിയാവുന്നത് എന്നും കേരളത്തിലെ ആശുപത്രികള്‍ക്ക് ചൈനീസ് സര്‍ക്കാരിന്റെ സാമ്പത്തിക സഹായം ഇതിനായി കിട്ടുന്നുണ്ട് എന്നും സൂപ്പര്‍സ്റ്റാര്‍ സരോജ് കുമാര്‍ പറയുന്നു. താനും കുടുംബവും വര്ഷങ്ങളായി ഇത് കാരണം വെള്ളം കുടിക്കാറില്ല എന്നും അത്‌കൊണ്ട് തന്നെ തങ്ങള്‍ക്ക് യാതൊരു ആരോഗ്യ പ്രശ്‌നവും ഉണ്ടായിട്ടില്ല എന്നും വെള്ളം കുടിക്കുന്നത് നല്ലതാണ് എന്ന് പ്രചരിപ്പിക്കുന്നത് ഇവിടത്തെ മരുന്ന് മാഫിയയുടെ ദല്ലാളന്മാര്‍ ആണ് എന്നും അദ്ദേഹം തുറന്നടിച്ചു.
എങ്കിലും ഇത്രമാത്രം ആരോഗ്യ പ്രശ്‌നങ്ങള്‍ ഉണ്ടാക്കുന്ന ചൈനീസ് വെള്ളം കണ്ടു പിടിക്കാനോ അതിനെതിരെ നടപടിയെടുക്കാനോ അധികൃതര്‍ ഇനിയും തയാറായിട്ടില്ല . ഈ പോസ്റ്റ് മാക്‌സിമം ഷെയര്‍ ചെയ്യുക നമ്മുടെ നാടിനെ ഒരു മഹാവിപത്തില്‍ നിന്ന് രക്ഷിക്കുക!