ഐ.സി.സി ചാമ്പ്യന്‍സ് ട്രോഫിയില്‍ ഇന്ത്യ തങ്ങളുടെ അവസാന ഗ്രൂപ്പ് ഘട്ട മത്സരത്തിനിറങ്ങുകയാണ്. മാര്‍ച്ച രണ്ടിന് ദുബായ് അന്താരാഷ്ട്ര സ്റ്റേഡിയത്തില്‍ നടക്കുന്ന മത്സരത്തില്‍ ന്യൂസിലാന്‍ഡാണ് എതിരാളികള്‍. ഗ്രൂപ്പ് ഘട്ടത്തിലെ ആദ്യ രണ്ട് മത്സരങ്ങളും വിജയിച്ചാണ് ഇരു ടീമുകളും ഗ്രൂപ്പ് ഘട്ടത്തിലെ അവസാന മത്സരത്തിനിറങ്ങുന്നത്.

ഗ്രൂപ്പ് ഘട്ടം അവസാനിക്കുന്നതിന് മുമ്പ് തന്നെ ന്യൂസിലാന്‍ഡും ഇന്ത്യയും സെമി ഫൈനലിന് യോഗ്യത നേടിയിട്ടുണ്ട്. ഈ മത്സരത്തില്‍ വിജയിക്കുന്ന ടീം ഗ്രൂപ്പ് സ്റ്റാന്‍ഡിങ്‌സില്‍ ഒന്നാം സ്ഥാനത്തെത്തും എന്നതിനാല്‍ തന്നെ വിജയം ലക്ഷ്യമിട്ടാകും ഇരു ടീമുകളും കളത്തിലിറങ്ങുക.

ഈ മത്സരത്തില്‍ വിജയിച്ചാല്‍ ഇന്ത്യന്‍ നായകന്‍ രോഹിത് ശര്‍മയെ പല റെക്കോഡുകളും കാത്തിരിക്കുന്നുണ്ട്. ഐ.സി.സി ടൂര്‍ണമെന്റുകളില്‍ തുടര്‍ച്ചയായി ഏറ്റവുമധികം വിജയം സ്വന്തമാക്കുന്ന ഇന്ത്യന്‍ നായകന്‍മാരുടെ പട്ടികയില്‍ സ്വന്തം റെക്കോഡ് തകര്‍ക്കാനുള്ള അവസരമാണ് രോഹിത്തിന് മുമ്പിലുള്ളത്.

12 വിജയവുമായി എം.എസ്. ധോണി ഒന്നാം സ്ഥാനത്ത് നില്‍ക്കുന്ന പട്ടികയില്‍ അടുത്ത രണ്ട് സ്ഥാനങ്ങളിലും രോഹിത് ശര്‍മയാണ് ഇടം നേടിയിരിക്കുന്നത്.

തുടര്‍ച്ചയായി ഏറ്റവുമധികം ഐ.സി.സി മത്സരങ്ങളില്‍ വിജയിച്ച ഇന്ത്യന്‍ ക്യാപ്റ്റന്‍മാര്‍

(താരം – വിജയം – സ്പാന്‍ എന്നീ ക്രമത്തില്‍)

എം.എസ്. ധോണി – 12 – 2012-2014

രോഹിത് ശര്‍മ – 10* – 2024-25

രോഹിത് ശര്‍മ – 10 – 2023

സൗരവ് ഗാംഗുലി – 8 – 2023

എം. എസ്. ധോണി – 7 – 2015

2023 ഏകദിന ലോകകപ്പില്‍ ഒറ്റ മത്സരം പോലും പരാജയപ്പെടാതെയാണ് ഇന്ത്യ ഫൈനലിനെത്തിയത്. ആദ്യ ഘട്ടത്തിലെ ഒമ്പത് മത്സരങ്ങളിലും ആധികാരികമായി വിജയിച്ച ഇന്ത്യ, സെമി ഫൈനലില്‍ ന്യൂസിലാന്‍ഡിനെ ഒരിക്കല്‍ക്കൂടി പരാജയപ്പെടുത്തി. എന്നാല്‍ കലാശപ്പോരാട്ടത്തില്‍ കങ്കാരുക്കളോട് പരാജയപ്പെട്ടു.

2024 ടി-20 ലോകകപ്പിലെ പ്രകടനത്തിന് പിന്നാലെയാണ് ഈ സ്ട്രീക് വീണ്ടും പിറവിയെടുത്തത്. ലോകകപ്പിലെ ഒറ്റ മത്സരം പോലും ഇന്ത്യ പരാജയപ്പെട്ടിരുന്നില്ല. കളിച്ച എട്ട് മത്സരത്തില്‍ എട്ടിലും ഇന്ത്യ വിജയിച്ചിരുന്നു.

ഇതിന് ശേഷം ഇന്ത്യ അടുത്ത ഐ.സി.സി മത്സരം കളിക്കുന്നത് ചാമ്പ്യന്‍സ് ട്രോഫിയിലാണ്. ആദ്യ രണ്ട് മത്സരത്തിലും ടീമിനെ വിജയത്തിലേക്ക് നയിച്ച രോഹിത് ന്യൂസിലാന്‍ഡിനെതിരെ വിജയിച്ച് തന്റെ റെക്കോഡ് തകര്‍ക്കാനുള്ള ഒരുക്കത്തിലാണ്.

Content Highlight: ICC Champions Trophy 2025: Rohit Sharma need one win to shatter his own record of most consecutive wins by an Indian captain in ICC matches