കൊച്ചി: ഐ.എസ്.എല്‍ അഞ്ചാം സീസണില്‍ കേരള ബ്ലാസ്റ്റേഴ്‌സിനായ കളിക്കാനുണ്ടാകില്ലെന്ന് കനേഡിയന്‍ താരം ഇയാന്‍ ഹ്യൂം. ക്ലബില്‍ കളിക്കാന്‍ ആഗ്രഹമുണ്ടെങ്കിലും മാനേജ്‌മെന്റിന് തന്നെ നിലനിര്‍ത്താന്‍ താല്‍പ്പര്യമില്ലെന്നാണ് അറിയാന്‍ കഴിഞ്ഞതെന്ന് ആരാധകരുടെ ഹ്യൂമേട്ടന്‍ വ്യക്തമാക്കി.
അതേസമയം അടുത്ത സീസണില്‍ ബ്ലാസ്റ്റേഴ്‌സിന് എല്ലാവിധ ആശംസകളും നേരുന്നതായും ഹ്യൂം കൂട്ടിച്ചേര്‍ത്തു.
“ക്ലബിലെ എല്ലാവര്‍ക്കും എന്റെ ആശംസകള്‍. ഞാനിതുവരെ കളിച്ചതില്‍ വെച്ച് ഏറ്റവും മികച്ച കാണികള്‍ക്കു മുന്നിലാണ് പന്ത് തട്ടിയത്. എന്നെ ആദ്യ സീസണ്‍ മുതല്‍ പിന്തുണച്ച എല്ലാവര്‍ക്കും നന്ദി.”
ALSO READ: അഭിമാനമായി വീണ്ടും ദിപ കര്‍മാകര്‍; പരിക്കില്‍ നിന്ന് തിരിച്ചുവന്ന് ലോകകീരിടം
ഐ.എസ്.എല്ലിലെ ഗോള്‍വേട്ടക്കാരില്‍ മുമ്പനാണ് ഹ്യൂം. 59 ഐ.എസ്.എല്‍ മത്സരങ്ങളില്‍ നിന്ന് ഇയാന്‍ ഹ്യൂം 28 ഗോളുകളാണ് നേടിയത്. കഴിഞ്ഞ സീസണില്‍ ഹാട്രിക്കടക്കം നേടി കേരള ബ്ലാസ്റ്റേഴ്‌സ് മുന്നേറ്റത്തിന് ചുക്കാന്‍ പിടിച്ചതും ഹ്യൂമായിരുന്നു.
എന്നാല്‍ ഇടയ്ക്ക് പരിക്കേറ്റതോടെ താരത്തിന് അവസാന മത്സരങ്ങള്‍ നഷ്ടമായിരുന്നു.
അനസ് എടത്തൊടിക, അബ്ദുള്‍ ഹക്കു, എംഎസ് ജിതിന്‍ എന്നീ മലയാളി താരങ്ങളെ ഈ സീസണില്‍ ഇതിനോടകം തന്നെ കേരള ബ്ലാസ്റ്റേഴ്‌സ് ഒപ്പു വെച്ചിട്ടുണ്ട്. നോര്‍ത്ത് ഈസ്റ്റ് സ്ട്രൈക്കര്‍ സിമിന്‍ലെന്‍ ഡൗങ്ങല്‍, ഫ്രഞ്ച് പ്രതിരോധ താരം സിറില്‍ കാലി എന്നീ താരങ്ങളെയും ബ്ലാസ്റ്റേഴ്‌സ് ഈ സീസണില്‍ ടീമിലെത്തിച്ചിട്ടുണ്ട്.