ന്യൂസിലാന്‍ഡിനെതിരെ മൂന്ന് മത്സരങ്ങളുടെ ഹോം ടെസ്റ്റ് പരമ്പര പരാജയപ്പെട്ടാണ് ഇന്ത്യ ക്രിക്കറ്റ് ലോകത്തിന് മുന്നില്‍ തലകുനിച്ചത്. ഇനി ഇന്ത്യയുടെ മുന്നിലുള്ള വലിയ റെഡ് ബോള്‍ ഇവന്റാണ് ബോര്‍ഡര്‍ ഗവാസ്‌കര്‍ ട്രോഫി. ഓസ്ട്രേലിയയുമായി നടക്കുന്ന പരമ്പര നവംബര്‍ 22നാണ് ആരംഭിക്കുന്നത്. പെര്‍ത്തില്‍ ആരംഭിക്കുന്ന ആദ്യ ടെസ്റ്റിന് മുന്നോടിയായി ഇന്ത്യന്‍ താരങ്ങള്‍ വമ്പന്‍ മുന്നൊരുക്കത്തിലാണ്.
‘ഓസീസ് ബൗളര്‍മാര്‍ വിരാട് കോഹ്‌ലിക്കെതിരെ എങ്ങനെയാണ് പന്തെറിയുക എന്നത് അല്‍പം രസകരമായിരിക്കും. അവര്‍ അവന്റെ ഫ്രണ്ട് പാഡ് ലക്ഷ്യമിടുമെന്ന് ഞാന് കരുതുന്നു. മാത്രമല്ല ബോഡി ബാഷ് ചെയ്യാന്‍ അവന്റെ ഷോള്‍ഡര്‍ ലക്ഷ്യമിടുകയും ചെയ്യും. വലംകൈയ്യന്‍ ബാറ്റര്‍ക്ക് അത് ഇത്തിരി ചൂടാകും, ആ പന്തുകള്‍ കളിക്കണമെങ്കില്‍ അവന് ചാടേണ്ടിവരും.
ഓസീസ് ഷോര്‍ട്ട് ലെഗ് പൊസിഷനില്‍ ഒരു ഫീല്‍ഡറെ തൊട്ടടുത്ത് വയ്ക്കും. അവന് ഒരു ബിഗ് ഷോട്ട് ആവശ്യമുണ്ടെങ്കില്‍ അതിനായി പോകട്ടെ. ഹുക്ക് അല്ലെങ്കില്‍ പുള്‍ കളിച്ച് ബൗളര്‍മാരെ ലക്ഷ്യമിടാന്‍ അയാള്‍ ശ്രമിച്ചേക്കാം, പക്ഷേ ഉയരം കൂടുതലാണെങ്കില്‍ അത് നിയന്ത്രിക്കാന്‍ പ്രയാസമായിരിക്കും,’ ഓസ്‌ട്രേലിയന്‍ ഇതിഹാസ കീപ്പര്‍ ഇയാന്‍ ഹീലി പറഞ്ഞു.
