നാനി, മൃണാള്‍ താക്കൂര്‍ എന്നിവര്‍ പ്രധാനകഥാപാത്രങ്ങളാവുന്ന ഹായ് നാണ്ണാ എന്ന ചിത്രത്തിലെ ആദ്യഗാനം പുറത്ത്. ഹൃദയമേ എന്ന് തുടങ്ങുന്ന ഗാനം സിത്താര കൃഷ്ണകുമാറും അനുരാഗ് കുല്‍ക്കര്‍ണിയും ചേര്‍ന്നാണ് ആലപിച്ചിരിക്കുന്നത്. ഹിഷാം അബ്ദുള്‍ വഹാബാണ് ഗാനത്തിന് സംഗീതം നല്‍കിയിരിക്കുന്നത്.
നവാഗതനായ ശൗര്യവ് സംവിധാനം ചെയ്ത ചിത്രം മോഹന്‍ ചെറുകുരിയും (സി.വി.എം) ഡോ. വിജേന്ദര്‍ റെഡ്ഡി ടീഗലയും ചേര്‍ന്ന് വൈര എന്റര്‍ടെയ്ന്‍മെന്റിന്റെ ബാനറിലാണ് നിര്‍മിച്ചിരിക്കുന്നത്. പാന്‍ ഇന്ത്യനായി ഒരുങ്ങുന്ന ചിത്രം അച്ഛന്‍-മകള്‍ ബന്ധത്തെക്കുറിച്ചാണ് സംസാരിക്കുന്നത്.
ചിത്രത്തില്‍ ബേബി കിയാര ഖന്നയാണ് മറ്റൊരു സുപ്രധാന കഥാപാത്രത്തെ അവതരിപ്പിക്കുന്നത്. തെലുങ്ക്, തമിഴ്, കന്നഡ, മലയാളം, ഹിന്ദി എന്നീ ഭാഷകളിലായി ഡിസംബര്‍ 21ന് ചിത്രം തിയേറ്ററുകളിലെത്തും.
സാനു ജോണ്‍ വര്‍ഗീസ് ഐ.എസ്.സി. ഛായാഗ്രഹണം നിര്‍വഹിക്കുന്ന ചിത്രത്തിന്റെ ചിത്രസംയോജനം പ്രവീണ്‍ ആന്റണി കൈകാര്യം ചെയ്യുന്നു. അവിനാഷ് കൊല്ലയാണ് പ്രൊഡക്ഷന്‍ ഡിസൈനര്‍. എക്സിക്യൂട്ടീവ് പ്രൊഡ്യൂസര്‍ സതീഷ് ഇവിവി. വസ്ത്രാലങ്കാരം: ശീതള്‍ ശര്‍മ. പി.ആര്‍.ഒ: ശബരി.
Content Highlight: Hridayame song from Hi Nanna movie