ന്യൂദല്‍ഹി: കശ്മീരി പണ്ഡിറ്റുകളുടെ പലായന വിഷയത്തില്‍ ബി.ജെ.പി രാഷ്ട്രീയം കളിക്കുകയാണെന്ന് ദല്‍ഹി മുഖ്യമന്ത്രി അരവിന്ദ് കെജ്‌രിവാള്‍. കേന്ദ്രത്തില്‍ പാര്‍ട്ടി അധികാരത്തില്‍ വന്നതിന് ശേഷം എത്രപേര്‍ താഴ്വരയിലേക്ക് മടങ്ങിയെന്നും കെജ്‌രിവാള്‍ ചോദിച്ചു.
”കഴിഞ്ഞ 25 വര്‍ഷത്തിനിടയില്‍, കശ്മീരി പണ്ഡിറ്റുകളുടെ പലായനം മുതല്‍, കഴിഞ്ഞ എട്ട് വര്‍ഷമുള്‍പ്പെടെ 13 വര്‍ഷമായി കേന്ദ്രത്തില്‍ ബി.ജെ.പി സര്‍ക്കാരുകള്‍ ഉണ്ടായിരുന്നു. ഈ കാലയളവില്‍ ഏതെങ്കിലും കശ്മീരി പണ്ഡിറ്റ് കുടുംബത്തെ പുനരധിവസിപ്പിച്ചിട്ടുണ്ടോ? ഒരു കുടുംബം പോലും കശ്മീരിലേക്ക് തിരിച്ചെത്തിയിട്ടില്ല,” അദ്ദേഹം പറഞ്ഞു.
വിവേക് അഗ്‌നിഹോത്രിയുടെ കശ്മീര്‍ ഫയല്‍സിനെതിരെ വിമര്‍ശനം ഉയര്‍ന്നുവരുന്നതിനിടെ ചിത്രം യൂട്യൂബില്‍ ഇട്ട് അതില്‍ നിന്നുള്ള വരുമാനം കാശ്മീരി പണ്ഡിറ്റുകളുടെ ക്ഷേമത്തിനായി ചെലവഴിക്കണമെന്ന് നേരത്തെ കെജ്‌രിവാള്‍ പറഞ്ഞിരുന്നു.
പാകിസ്ഥാന്‍ പിന്തുണയുള്ള ഭീകരരുടെ പീഡനത്തെതുടര്‍ന്ന് കശ്മീരില്‍ നിന്നും പലായനം ചെയ്യുന്ന ഹിന്ദുവിശ്വാസികളുടെ കഥയാണ് കശ്മീര്‍ ഫയല്‍സ് പറയാന്‍ ശ്രമിച്ചിരിക്കുന്നത്.
എന്നാല്‍ സിനിമയുടെ വര്‍ഗീയ ധ്രുവീകരണത്തിനെതിരെ നിരവധിപേര്‍ രംഗത്തെത്തിയിട്ടുണ്ട്. ഇന്ത്യയിലെ മാറിയ രാഷ്ട്രീയ സാഹചര്യത്തില്‍ മത വര്‍ഗീയ സംഘര്‍ഷങ്ങള്‍ വര്‍ധിപ്പിക്കുന്ന രീതിയിലാണ് സിനിമ നിര്‍മിച്ചിരിക്കുന്നതെന്നാണ് വിമര്‍ശനം.
Content Highlights: “How Many Kashmiri Pandits Relocated By BJP In 8 Years?”: Arvind Kejriwal
