ഭര്‍ത്താവിന്റെ നിര്‍ദേശപ്രകാരം വീട്ടമ്മയുടെ ഫോണ്‍ ചോര്‍ത്തി അസിസ്റ്റന്റ് കമ്മീഷണര്‍
ഡൂള്‍ന്യൂസ് ഡെസ്‌ക്
Thursday, 4th November 2021, 9:53 pm
കോഴിക്കോട്: ചേവായൂര്‍ ബലാത്സംഗ കേസിന്റെ മറവില്‍ കോഴിക്കോട് മെഡിക്കല്‍ കോളേജ് അസിസ്റ്റന്റ് പൊലീസ് കമ്മീഷണര്‍ വഴിവിട്ട അന്വേഷണം നടത്തിയതായി പരാതി. എ.സി.പി സുദര്‍ശനന്‍ തന്റെ അറിവോ സമ്മതമോ ഇല്ലാതെ ഫോണ്‍ രേഖകള്‍ ഭര്‍ത്താവിന് ചോര്‍ത്തി നല്‍കിയെന്നാണ് പൊന്നാനി സ്വദേശിനിയായ വീട്ടമ്മയുടെ പരാതി.
മലപ്പുറം എസ്.പിയ്ക്കായിരുന്നു പരാതി നല്‍കിയത്. പരാതിയെത്തുടര്‍ന്ന് എ.സി.പിയ്‌ക്കെതിരെ നടപടിയ്ക്ക് ശുപാര്‍ശ ചെയ്തിട്ടുണ്ട്. വകുപ്പ് തല അന്വേഷണത്തിന് പിന്നാലെയാണ് നടപടി.
കഴിഞ്ഞ ദിവസം അന്വേഷണ റിപ്പോര്‍ട്ട് മലപ്പുറം എസ്.പി ഡി.ജി.പിയ്ക്ക് കൈമാറിയിരുന്നു. എ.സി.പിയുടെ ഭാഗത്ത് നിന്ന് ഗുരുതര വീഴ്ചയുണ്ടായെന്ന് കണ്ടെത്തിയതിനെത്തുടര്‍ന്നാണ് നടപടിയ്ക്ക് ശുപാര്‍ശ.
