ലോകം മുഴുവനും ഏറെ ആരാധകരുളള സീരീസാണ് ‘ഗെയിം ഓഫ് ത്രോണ്‍സ്’. ഇതിന്റെ പ്രീക്വല്‍ സീരീസായ ഹൗസ് ഓഫ് ദി ഡ്രാഗണിനും ഒരുപാട് ആരാധകരുണ്ട്. നിലവില്‍ ഹൗസ് ഓഫ് ദി ഡ്രാഗണിന്റെ രണ്ടാം ഭാഗത്തിനുള്ള കാത്തിരിപ്പിലാണ് എല്ലാവരും.
സീരീസിന്റെ നിര്‍മാതാക്കള്‍ ഹൗസ് ഓഫ് ദി ഡ്രാഗണിന്റെ ട്രെയ്‌ലറുകള്‍ പുറത്തുവിട്ടു. രണ്ടാം ഭാഗത്തിനായി ബ്ലാക്ക് ട്രെയ്‌ലര്‍ – ഗ്രീന്‍ ട്രെയ്‌ലര്‍ എന്നീ പേരുകളില്‍ രണ്ടു ട്രെയ്‌ലറുകളാണ് ഉള്ളത്.
സീരീസിനായി കാത്തിരിക്കുന്നവരോട് അലിസെന്റ്, റൈനൈറ എന്നീ രണ്ട് കഥാപാത്രങ്ങളില്‍ നിന്നും ഒരു കഥാപാത്രത്തെ തെരഞ്ഞെടുക്കാനാണ് ട്രെയ്‌ലറുകളിലൂടെ ആവശ്യപ്പെടുന്നത്.
ഹൗസ് ഓഫ് ദി ഡ്രാഗണിന്റെ ആരാധകര്‍ ഏത് ഭാഗത്താണ് നില്‍ക്കുന്നതെന്ന ചോദ്യം ഈ ട്രെയ്‌ലറുകള്‍ ചോദിക്കുന്നു. റൈനൈറയുടെ ബ്ലാക്ക് ടീമിനൊപ്പമാണോ അതോ അലിസെന്റിന്റെ ഗ്രീന്‍ ടീമിനൊപ്പമാണോ എന്നതാണ് ചോദ്യം.
ജൂണ്‍ 16നാണ് രണ്ടാം ഭാഗമെത്തുന്നത്. മാറ്റ് സ്മിത്ത്, ഒലിവിയ കുക്ക്, എമ്മ ഡി. ആര്‍സി, ഈവ് ബെസ്റ്റ്, സ്റ്റീവ് ടൗസെന്റ്, ഫാബിയന്‍ ഫ്രാങ്കല്‍, ഇവാന്‍ മിച്ചല്‍, ടോം ഗ്ലിന്‍-കാര്‍ണി, സോനോയ മിസുനോ, റൈസ് ഇഫാന്‍സ് എന്നിവര്‍ രണ്ടാം ഭാഗത്തിലൂടെ തിരിച്ചെത്തും.
‘ഹൗസ് ഓഫ് ദി ഡ്രാഗണി’ന്റെ പത്ത് എപ്പിസോഡുകളുള്ള ആദ്യ സീസണ്‍ 2022 ഓഗസ്റ്റ് 21 മുതല്‍ ഒക്ടോബര്‍ 23 വരെയായിരുന്നു സംപ്രേക്ഷണം ചെയ്തിരുന്നത്. അമേരിക്കന്‍ നോവലിസ്റ്റും തിരക്കഥാകൃത്തുമായ ജോര്‍ജ് ആര്‍.ആര്‍. മാര്‍ട്ടിന്‍ എഴുതിയ ‘ഫയര്‍ ആന്റ് ബ്ലഡ്’ എന്ന പുസ്തകത്തെ ആസ്പദമാക്കിയാണ് ഇതിന്റെ കഥ.
2019ല്‍ ഇറങ്ങിയ ‘ഗെയിം ഓഫ് ത്രോണ്‍സ്’ സീരീസിലെ കഥാസന്ദര്‍ഭങ്ങള്‍ നടക്കുന്നതിനും മുന്നൂറ് വര്‍ഷങ്ങള്‍ മുമ്പുള്ള കഥയായിരുന്നു ‘ഹൗസ് ഓഫ് ദി ഡ്രാഗണി’ലൂടെ പറയുന്നത്.
Content Highlight: House Of The Dragon 2 Trailers Out
