ചെന്നൈ: സാമൂഹിക പരിഷ്‌കര്‍ത്താവ് പെരിയാറിന്റെ പേരില്‍ ഹോട്ടല്‍ തുറക്കുന്നതിനെതിരായി ഹര്‍ത്താല്‍ നടത്തി ഹിന്ദു മുന്നണി. ഇന്നലെയാണ് ആര്‍.എസ്.എസിന്റെ നേതൃത്വത്തിലുള്ള ഹിന്ദു മുന്നണി തമിഴ്‌നാട്ടിലെ കാരമട, മാട്ടുപ്പാളയം പ്രദേശങ്ങളില്‍ ചൊവ്വാഴ്ച ഹര്‍ത്താല്‍ പ്രഖ്യാപിക്കുന്നത്.
പെരിയാറിന്റെ പേരില്‍ ആര്‍ക്കും സ്ഥാപനം തുടങ്ങാനുള്ള അവകാശമില്ലെന്നാണ് ഇവരുടെ ഭീഷണി. കഴിഞ്ഞ ആഴ്ച പെരിയാറിന്റെ പേരില്‍ തുടങ്ങാനിരുന്ന ഈ ഹോട്ടല്‍ തകര്‍ത്ത ഹിന്ദു മുന്നണി പ്രവര്‍ത്തരെ പൊലീസ് അറസ്റ്റ് ചെയ്തിരുന്നു. ഇതിലെ പ്രതികളെ വെറുതെവിടണമെന്നും ഇവര്‍ ആവശ്യപ്പെടുന്നുണ്ട്.
എന്നാല്‍ ഹര്‍ത്താല്‍ ദിവസം തുടങ്ങാന്‍ അനുവധിക്കില്ലെന്ന് ആഹ്വാനം ചെയ്ത കട ഇന്ന് തുറന്നുപ്രവര്‍ത്തിക്കുകയാണ്. ഹിന്ദു മുന്നണി ഹര്‍ത്താല്‍ പ്രഖ്യാപിച്ചപ്പോള്‍ തന്നെ അവിടുത്തെ പ്രാദേശിക ഡി.എം.ക്കെയും പൊലീസും കട തുറക്കാനുള്ള പിന്തുണ നല്‍കിയിരുന്നു. ഹര്‍ത്താല്‍ ദിവസമായ ഇന്ന് പകുതിയോളം കടകളും തുറന്നുപ്രവര്‍ത്തിക്കുന്നുണ്ടെന്ന് പ്രദേശവാസികള്‍ ഡൂള്‍ന്യൂസിനോട് പറഞ്ഞു.
ഹോട്ടല്‍ ഉടമകളായ നാഗറാണി(38), മകന്‍ അരുണ്‍(21) എന്നിവരെ ഹിന്ദു മുന്നണി പ്രവര്‍ത്തകര്‍ നേരത്തെ ക്രൂരമായി മര്‍ദിച്ചിരുന്നു.
