ഹിന്ദി അറിയാത്തതിന്റെ പേരിലും തമിഴ്‌നാട്ടുകാരായതിന്റെ പേരിലും നേരിടേണ്ടി വന്ന ദുരനുഭവങ്ങള്‍ പങ്കുവെച്ച് തമിഴ്‌നാട്ടിലെ രാഷ്ട്രീയ-സാംസ്‌ക്കാരിക മേഖലകളില്‍ നിന്നുള്ളവര്‍ രംഗത്തുവന്നതിന് പിന്നാലെ ട്വിറ്ററില്‍ ട്രെന്‍ഡിംഗായി പുതിയ ക്യാംപെയ്ന്‍. ‘ഹിന്ദി തെരിയാത് പോടാ’ എന്ന് തമിഴില്‍ എഴുതിയ ഹാഷ് ടാഗാണ് ട്രെന്‍ഡിംഗ് ആവുന്നത്.
തമിഴ് സംഗീതസംവിധായകന്‍ യുവന്‍ ശങ്കര്‍ രാജയും യുവനടന്‍ മെട്രോ ശിരിഷും ‘ഹിന്ദി തെരിയാത് പോടാ’ ‘ഐ ആം എ തമിഴ് പേസും ഇന്ത്യന്‍’എന്നീ ക്യാപ്ഷനുകളോടുകൂടിയ ഡിസൈനര്‍ ടീ-ഷര്‍ട്ട് ധരിച്ചുനില്‍ക്കുന്ന പടം ട്വീറ്റ് ചെയ്തിരുന്നു ഇതിന് പിന്നാലെയാണ് ഈ ഹാഷ്ടാഗ് ക്യാംപെയ്ന്‍ ആരംഭിച്ചത്.
#TamilspeakingIndian #StopHindiImposition എന്നീ ഹാഷ്ടാഗുകളും ഇതിനൊപ്പം ട്രെന്‍ഡാവുന്നുണ്ട്. നിരവധി പേരാണ് ഈ ഹാഷ്ടാഗ് ചേര്‍ത്തുകൊണ്ട് ട്വീറ്റ് ചെയ്തിരിക്കുന്നത്.
2011ല്‍ ദല്‍ഹി എയര്‍പോര്‍ട്ടില്‍വെച്ച് താന്‍ നേരിട്ട മോശം അനുഭവം തുറന്നുപറഞ്ഞുകൊണ്ട് സിനിമാസംവിധായകനായ വെട്രിമാരന്‍ കഴിഞ്ഞ ദിവസം രംഗത്തുവന്നിരുന്നു. മോണ്‍ട്രിയല്‍ ഫിലിം ഫെസ്റ്റിവെല്ലില്‍ ആടുകളം സിനിമയുടെ സ്‌ക്രീനിങ് കഴിഞ്ഞ് കാനഡയില്‍ നിന്ന് തിരിച്ചുവരുംവഴിയാണ് ഇമിഗ്രേഷന്‍ ഉദ്യോഗസ്ഥന്‍ അദ്ദേഹത്തോട് മോശമായി പെരുമാറിയതെന്നാണ് ഒരു മാഗസിനു നല്‍കിയ അഭിമുഖത്തില്‍ വെട്രിമാരന്‍ പറഞ്ഞത്.
Deep in discussion , good things coming our way … ! 😬😬🥰🥰 @thisisysr pic.twitter.com/VSgaNQQNvw
— 𝙈𝙚𝙩𝙧𝙤 𝙨𝙝𝙞𝙧𝙞𝙨𝙝 (@actor_shirish) September 5, 2020
എയര്‍പോര്‍ട്ടില്‍വെച്ച് തന്നോട് ഹിന്ദിയില്‍ സംസാരിച്ച ഉദ്യോഗസ്ഥനോട് തനിക്ക് ഹിന്ദി അറിയില്ലെന്നു പറഞ്ഞപ്പോള്‍ രാജ്യത്തിന്റെ മാതൃഭാഷ അറിയാതിരിക്കുന്നതെങ്ങനെയെന്ന് ചോദിച്ചു. തമിഴാണ് തന്റെ മാതൃഭാഷയെന്നും മറ്റു ഭാഷ സംസാരിക്കുന്ന ആളുകളുമായി ആശയവിനിമയം നടത്തേണ്ടി വരുമ്പോള്‍ ഇംഗ്ലീഷിലാണ് സംസാരിക്കാറെന്ന് മറുപടി നല്‍കിയെന്നും എന്നാല്‍ അതിനുള്ള പ്രതികരണം മോശമായിരുന്നെന്നും വെട്രിമാരന്‍ വെളിപ്പെടുത്തിയിരുന്നു.
തമിഴരും കശ്മീരികളും എപ്പോഴും ഇങ്ങനെയാണെന്നും രാജ്യത്തെ തകര്‍ക്കാനാണ് ശ്രമിക്കുന്നതെന്നുമാണ് ഉദ്യോഗസ്ഥന്‍ ചോദിച്ചതെന്നും അദ്ദേഹം പറഞ്ഞു. എന്റെ മാതൃഭാഷ സംസാരിക്കുന്നത് രാജ്യത്തിന്റെ ഐക്യത്തെ എങ്ങനെ തകര്‍ക്കും? എന്റെ മാതൃഭാഷ രാജ്യത്തിന്റെ വികസനത്തിന് എങ്ങനെ തടസ്സമാകും എന്നുമായിരുന്നു സംഭവത്തോട് പ്രതികരിച്ചുക്കൊണ്ട് വെട്രിമാരന്‍ പറഞ്ഞത്.
If this can happen to award winning directors, imagine how much discrimination would be faced by common man!#ஹிந்தி_தெரியாது_போடா pic.twitter.com/CjWu0OwHzV
— Gowtham Sundar T.K.S.L (@GowthamSundarL) September 6, 2020
വെട്രിമാരന്റെ അഭിമുഖം കഴിഞ്ഞ ദിവസങ്ങളില്‍ വലിയ ചര്‍ച്ചയായിരുന്നു. ഇതിനു പിന്നാലെയാണ് ട്വിറ്ററില്‍ ഹിന്ദി ഭാഷ അടിച്ചേല്‍പ്പിക്കാനുള്ള ശ്രമങ്ങള്‍ക്കെതിരെ പ്രതിഷേധം വീണ്ടും ശക്തമായതെന്നാണ് കരുതുന്നത്. അതേസമയം സമാനമായ അനുഭവങ്ങള്‍ തുറന്നുപറഞ്ഞുകൊണ്ട് തമിഴ്നാട്ടില് നിന്നും നിരവധി പേരാണ് കഴിഞ്ഞ മാസം രംഗത്തെത്തിയത്.
