ലഖ്‌നൗ: കര്‍ഷകരുടെ പ്രതിഷേധത്തിനിടയിലേക്ക് കേന്ദ്രമന്ത്രി അജയ് മിശ്രയുടെ മകന്‍ ഓടിച്ചുകയറ്റിയ കാറിനടിയില്‍പ്പെട്ട് കര്‍ഷകരുള്‍പ്പെടെ എട്ട് പേരാണ് ഉത്തർപ്രദേശിലെ ലഖിംപൂരില്‍ കൊല്ലപ്പെട്ടത്. അക്കൂട്ടത്തില്‍ ഒരു മാധ്യമപ്രവര്‍ത്തകനും ഉള്‍പ്പെടുന്നുണ്ട്.
രമണ്‍ കശ്യപ് എന്ന മാധ്യമപ്രവര്‍ത്തകനാണ് കേന്ദ്രമന്ത്രിയുടെ മകന്‍ ഓടിച്ചുകയറ്റിയ കാറിനടിയില്‍പ്പെട്ട് കൊല്ലപ്പെട്ടത്. ഇപ്പോള്‍ മകന്റെ മരണത്തില്‍ പ്രതികരണവുമായി എത്തിയിരിക്കുകയാണ് അദ്ദേഹത്തിന്റെ അച്ഛന്‍ റാം ദുലാരി.
” അവന്‍ ചെയ്തത് മാധ്യമപ്രവര്‍ത്തകന്റെ കടമയാണ്. തിരിച്ചറിയാത്ത ഒരു മൃതദേഹമുണ്ടെന്ന് പറഞ്ഞ് എനിക്ക് പുലര്‍ച്ചെ 3 മണിക്ക് ഒരു ഫോണ്‍കോള്‍ വന്നു.
മോര്‍ച്ചറിയിലേക്ക് പോയപ്പോള്‍ അത് എന്റെ മകനായിരുന്നു,” അദ്ദേഹം പറഞ്ഞു.
കാര്‍ഷികനിയമങ്ങള്‍ക്കെതിരെ നടന്ന കര്‍ഷകരുടെ പ്രതിഷേധത്തിനിടയിലേക്ക് കേന്ദ്ര ആഭ്യന്തര സഹമന്ത്രി അജയ് മിശ്രയുടെ മകന്‍ ആശിഷ് മിശ്ര വാഹനം ഇടിച്ചുകയറ്റുകയായിരുന്നു. നാല് കര്‍ഷകരുള്‍പ്പെടെ എട്ടുപേരാണ് അപകടത്തില്‍ കൊല്ലപ്പെട്ടത്.
