ബെംഗളൂരു: കൂറുമാറി ബി.ജെ.പിയില്‍ ചേര്‍ന്ന എം.എല്‍.എമാര്‍ക്ക് ഉപതെരഞ്ഞെടുപ്പ് ഫലത്തിലൂടെ തക്കതായ മറുപടി നല്‍കണമെന്ന് ജനതാദള്‍ എസ് നേതാവ് എച്ച്.ഡി കുമാരസ്വാമി. ഉപതെരഞ്ഞെടുപ്പിനെ ജനതാദള്‍ എസ് വളരെ ഗൗരവത്തോടെയാണ് കാണുന്നതെന്നും കുമാരസ്വാമി പറഞ്ഞു.
സംസ്ഥാന സര്‍ക്കാരിന്റെ വിധി ഉപതെരഞ്ഞെടുപ്പിന്റെ ഫലത്തെ അനുസരിച്ചിരിക്കും. ബി.ജെ.പിയേക്കാളും കോണ്‍ഗ്രസിനേക്കാളും കൂടുതല്‍ സീറ്റുകള്‍ ജനതാദള്‍ എസ് നേടും. ഞങ്ങളുടെ പാര്‍ട്ടിയില്‍ നിന്ന് വിട്ടുപോയവര്‍ക്ക് തിരിച്ചു വരാതെ മറ്റൊരു വഴിയുമില്ലെന്നും കുമാരസ്വാമി പറഞ്ഞു.
സംസ്ഥാനത്തെ വിവിധ ജില്ലകളിലെ പ്രളബാധിതരെ സംസ്ഥാന സര്‍ക്കാര്‍ പൂര്‍ണ്ണമായും മറന്നു. ദുരന്തബാധിതര്‍ക്ക് 5000 രൂപയും 10000 രൂപയും നല്‍കിയ സര്‍ക്കാര്‍ നടപടി ചോദ്യം ചെയ്യേണ്ടതാണ്. കുറഞ്ഞ തുക മാത്രം നല്‍കിയ സര്‍ക്കാര്‍ നടപടി ഇരകളുടെ മനസ്സിലുണ്ടെന്നും കുമാരസ്വാമി പറഞ്ഞു.
