തിരുവനന്തപുരം: ഉത്ര വധക്കേസിലെ വിധിയുടെ പശ്ചാത്തലത്തില്‍ വധശിക്ഷയെ അനുകൂലിച്ച് ചെറിയാന്‍ ഫിലിപ്പിനെ പരിഹസിച്ച് അഡ്വ. ഹരീഷ് വാസുദേവന്‍. എത്രകാലം ഇടതുപക്ഷത്ത് നേതാവിന്റെ കൂടെ ബുദ്ധിജീവിയായി നിന്നാലും ഇടയ്ക്ക് പഴയ നിലവാരം കാണിക്കുമെന്നായിരുന്നു ഹരീഷിന്റെ പ്രതികരണം.
‘അതിക്രൂരവും ആസൂത്രിതവുമായി ഉത്രയെ കൊല ചെയ്ത സൂരജിനു് വധശിക്ഷ നല്‍കേണ്ടതായിരുന്നു ജീവപര്യന്തം സുഖവാസമാണ്,’ എന്നായിരുന്നു ചെറിയാന്‍ ഫിലിപ്പിന്റെ ഉത്രവധക്കേസ് വിധിയിലെ പ്രതികരണം.
ഇതിന് താഴെ കമന്റ് ചെയ്തായിരുന്നു ഹരീഷിന്റെ മറുപടി.
ഉത്ര കേസുമായി ബന്ധപ്പെട്ട് നേരത്തെ തന്നെ ഹരീഷ് തന്റെ നിലപാട് വ്യക്തമാക്കിയിരുന്നു. കൊലയ്ക്ക് എല്ലായ്‌പ്പോഴും പരിഹാരം നിയമപരമായ കൊലയല്ലെന്നും കൊല്ലപ്പെട്ട ആളിന്റെ ബന്ധുക്കളുടെ വൈകാരിക തൃപ്തിയല്ല നിയമവ്യവസ്ഥയില്‍ ശിക്ഷയുടെ മാനദണ്ഡവും ഉദ്ദേശവുമെന്നും അദ്ദേഹം പറഞ്ഞിരുന്നു.
ഒക്ടോബര്‍ 13 നാണ് ഉത്ര വധക്കേസില്‍ കോടതി വിധി പറഞ്ഞത്.കേസില്‍ ഉത്രയുടെ ഭര്‍ത്താവ് സൂരജ് കുറ്റക്കാരനാണെന്ന് കണ്ടെത്തിയ കൊല്ലം ആറാം അഡീഷണല്‍ സെഷന്‍സ് കോടതി 17 വര്‍ഷം തടവിനുശേഷം ഇരട്ടജീവപര്യന്തമാണ് വിധിച്ചിരിക്കുന്നത്. അഞ്ചു ലക്ഷം രൂപ പിഴയും വിധിച്ചിട്ടുണ്ട്.
പ്രതിക്ക് വധശിക്ഷ വിധിക്കാതിരുന്നത് ക്രിമിനല്‍ പശ്ചാത്തലമില്ലാത്തതും പ്രായവും പരിഗണിച്ചാണെന്ന് പ്രോസിക്യൂഷന്‍ വ്യക്തമാക്കിയിരുന്നു.
2020 മേയ് ഏഴിനാണ് അഞ്ചല്‍ ഏറം വെള്ളശ്ശേരില്‍വീട്ടില്‍ ഉത്രയെ (25) സ്വന്തംവീട്ടില്‍ മരിച്ചനിലയില്‍ കണ്ടെത്തിയത്. ഭര്‍ത്താവ് അടൂര്‍ പറക്കോട് സ്വദേശി സൂരജ് (27) ഭിന്നശേഷിക്കാരിയായ ഭാര്യയെ ഒഴിവാക്കാനും അവരുടെ സ്വത്ത് കൈക്കലാക്കാനും വേണ്ടി പാമ്പിനെക്കൊണ്ട് കടിപ്പിച്ചു കൊലപ്പെടുത്തിയെന്നായിരുന്നു കേസ്.
ആസൂത്രിത കൊല (ഇന്ത്യന്‍ ശിക്ഷാനിയമം 302-ാം വകുപ്പ്), നരഹത്യാശ്രമം (307ാം വകുപ്പ്), വിഷംനല്‍കി പരിക്കേല്‍പ്പിക്കല്‍ (328ാം വകുപ്പ്), തെളിവുനശിപ്പിക്കല്‍ (201 -ാം വകുപ്പ്) എന്നീ കുറ്റകൃത്യങ്ങള്‍ തെളിഞ്ഞതായി കോടതി കണ്ടെത്തിയിരുന്നു.
സംസ്ഥാനത്ത് പാമ്പിനെക്കൊണ്ട് കടിപ്പിച്ച് ഒരാളെ കൊലപ്പെടുത്തുന്ന ആദ്യ കേസാണിത്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Hareesh Vasudevan trolls Cherian Philip Death Penalty Uthra Murder