ഇന്ത്യയും ഓസ്‌ട്രേലിയയും തമ്മിലുള്ള സിഡ്‌നി ടെസ്റ്റിലും ഇന്ത്യ പരാജയപ്പെട്ടതോടെ ബോര്‍ഡര്‍ ഗവാസ്‌കര്‍ ട്രോഫിയിലെ അഞ്ച് മത്സരങ്ങളില്‍ 3-1ന് ഓസീസ് വിജയം സ്വന്തമാക്കിയത്. ബോര്‍ഡര്‍ ഗവാസ്‌കര്‍ ട്രോഫിയിലെത്തുമ്പോള്‍ വലിയ പ്രതീക്ഷ ഉണ്ടായിരുന്നെങ്കിലും ഇന്ത്യ തുടര്‍ പരാജയം ഏറ്റുവാങ്ങിയതോടെ പരമ്പര തോല്‍വിയും വേള്‍ ടെസ്റ്റ് ചാമ്പ്യന്‍ഷിപ്പ് ഫൈനല്‍ സാധ്യതയും ഇല്ലാതാക്കി.
എന്നിരുന്നാലും പരമ്പരയിലുടനീളം മിന്നും പ്രകടനമാണ് ജസ്പ്രീത് ബുംറ കാഴ്ചവെച്ചത്. പരമ്പരയിലെ താരമാകാനും ബുംറയ്ക്ക് സാധിച്ചിരുന്നു. അഞ്ച് മത്സരത്തില്‍ നിന്ന് 32 വിക്കറ്റുകള്‍ വീഴ്ത്തിയാണ് താരം അമ്പരപ്പിച്ചത്. മാത്രമല്ല പെര്‍ത്തിലെ ആദ്യ മത്സരത്തില്‍ ബുംറയുടെ ക്യാപ്റ്റന്‍സി മികവില്‍ ഇന്ത്യ വിജയം സ്വന്തമാക്കുകയും ചെയ്തു.
ഇപ്പോള്‍ താരത്തെ പ്രശംസിച്ച് സംസാരിക്കുകയാണ് മുന്‍ ഇന്ത്യന്‍ സ്പിന്നര്‍ ഹര്‍ഭജന്‍ സിങ്. ബുംറ പരമ്പരയില്‍ ഇല്ലായിരുന്നെങ്കില്‍ ഇന്ത്യ 0-5ന് പരാജയപ്പെടുമായിരുന്നു എവന്നാണ് ഹര്‍ഭജന്‍ പറഞ്ഞത്.
‘ജസ്പ്രീത് ബുംറയ്ക്ക് പര്യടനം നഷ്ടമായിരുന്നെങ്കില്‍, സ്‌കോര്‍ലൈന്‍ ഓസ്ട്രേലിയയ്ക്ക് അനുകൂലമായേനെ. ബോര്‍ഡര്‍-ഗവാസ്‌കര്‍ ട്രോഫിയില്‍ ഞങ്ങള്‍ 0-5ന് തോല്‍ക്കുമായിരുന്നു. പെര്‍ത്തിലെ കളി അദ്ദേഹം ഞങ്ങള്‍ക്ക് നേടിക്കൊടുത്തു, അഡ്‌ലെയ്ഡില്‍ ഒഴികെ ബുംറ ശ്രദ്ധേയനായിരുന്നു,’ ഹര്‍ഭജന്‍ സിങ് പറഞ്ഞു.
ടെസ്റ്റ് ക്രിക്കറ്റിലെ മിന്നും പ്രകടനത്തോടെ നിരവധി റെക്കോഡുകളും ബുംറ ഇതിനോടകം സ്വന്തമാക്കിയിട്ടുണ്ട്. മാത്രമല്ല 45 മത്സരങ്ങളിലെ 86 ഇന്നിങ്‌സില്‍ നിന്ന് 205 വിക്കറ്റുകള്‍ സ്വന്തമാക്കി മികവ് പുലര്‍ത്താനും താരത്തിന് സാധിച്ചിരുന്നു. 2.77എന്ന മികച്ച എക്കോണമിയിലും 19.4 എന്ന റെക്കോഡ് ആവറേജിലുമാണ് ബുംറ പേസ് ബൗളര്‍ കുലപതിയായി തകര്‍ക്കുന്നത്.
എന്നാല്‍ സിഡ്‌നിയില്‍ നടന്ന അവസാന ടെസ്റ്റില്‍ ക്യാപ്റ്റനായി ഇന്ത്യയെ നയിച്ചെങ്കിലും നടുവിന് പരിക്ക് പറ്റി താരം മാറി നിന്നിരുന്നു. ഇതോടെ താരത്തിന്റെ പരിക്കിന്റെ കാര്യത്തില്‍ വലിയ ആശങ്കയാണ് നിലനില്‍ക്കുന്നത്.
Content Highlight: Harbhajan Singh Talking About Jasprit Bumrah
