[]കോളിവുഡിലെ ഭാഗ്യവതിയായ നായികമാരില്‍ ഒരാളാണ് ഹന്‍സിക. ഹന്‍സികയുടെ കഴിഞ്ഞ രണ്ട് സിനിമകളും തിയേറ്ററില്‍ കുഴപ്പമില്ലാതെ ഓടി. സിംഗം 2ഉം, തീയ്യ വേലൈ സെയ്യാനും കുമാരുവും. സിമ്പുവുമൊത്തുളള പുതിയ സിനിമയുടെ തിരക്കിലാണ് ഹന്‍സിക.[]
അതിനിടയിലാണ് അപ്രതീക്ഷിതമായി ആ വാര്‍ത്ത പ്രചരിച്ചത്. ബോളിവുഡ് സൂപ്പര്‍ താരം സല്‍മാന്‍ ഖാന്‍ അവതാരകനായ പ്രശസ്ത റിയാലിറ്റി ഷോ ആയ ബിഗ് ബോസിന്റെ പുതിയ പതിപ്പില്‍ ഹന്‍സികയുമുണ്ടെന്ന്.
അതിവേഗം പ്രചരിച്ച വാര്‍ത്തയ്ക്ക സ്ഥിരീകരണവുമായി ഒടുവില്‍ ഹന്‍സിക തന്നെ രംഗത്തെത്തിയിരിക്കുകയാണ്. ബിഗ് ബോസിന്റെ ഏഴാം പതിപ്പില്‍ താനില്ലെന്ന വ്യക്തമാക്കി ഹന്‍സിക തന്നെയാണ് ഊഹാപോഹങ്ങള്‍ക്ക് വിരമമിട്ടത്.
തന്റെ ട്വിറ്റര്‍ അക്കൗണ്ടിലൂടെയാണ് ബിഗ് ബോസിന്റെ ഏഴാം പതിപ്പില്‍ താനുണ്ടാവില്ലെന്ന് ഹന്‍സിക വ്യക്തമാക്കിയത്. ” ഞാന്‍ ബിഗ് ബോസില്‍ പങ്കെടുക്കുന്നുവെന്ന റിപ്പോര്‍ട്ടുകള്‍ കേട്ടു. അങ്ങിനെയെങ്കില്‍ അഭിനയിക്കാമെന്ന വാക്ക് കൊടുത്ത സിനിമകള്‍ ആര് പൂര്‍ത്തിയാക്കും.
ബിഗ് ബോസ് കാണാനെനിക്കിഷ്ടമാണ്. പക്ഷെ അതിന്റെ ഭാഗമാകാനില്ല. നല്ല സിനിമകളുടെ ഭാഗമാവുക എന്നത് മാത്രമാണ് ഇപ്പോള്‍ എന്റെ ലക്ഷ്യം. ഹന്‍സിക തന്റെ ട്വിറ്റര്‍ അക്കൗണ്ടില്‍ വ്യക്തമാക്കുന്നു.