ഇത് സര്‍ക്കസോ സിനിമയോ അല്ല; വാദം നടക്കുന്നതിനിടെ ഷര്‍ട്ടിടാതെ വന്നയാളോട് ഹൈക്കോടതി
ഡൂള്‍ന്യൂസ് ഡെസ്‌ക്
Thursday, 11th November 2021, 10:57 am
കൊച്ചി: ഹൈക്കോടതിയില്‍ വാദം നടക്കുന്നതിനിടെ ഷര്‍ട്ടിടാതെ വന്നയാളെ രൂക്ഷമായി വിമര്‍ശിച്ച് ജഡ്ജി. കഴിഞ്ഞ ദിവസം വീഡിയോ കോണ്‍ഫറന്‍സിങ് വഴി നടത്തിയ സിറ്റിംഗിനിടെയായിരുന്നു സംഭവം.
ഷര്‍ട്ടിട്ട് വരാന്‍ നിര്‍ദേശിച്ച കോടതി അല്ലെങ്കില്‍ ഓണ്‍ലൈന്‍ വാദം കേള്‍ക്കലില്‍ നിന്ന് ഒഴിവാക്കേണ്ടി വരുമെന്നും പറഞ്ഞു.
‘ഇതു സര്‍ക്കസോ സിനിമയോ അല്ല കോടതിയാണ്,’ ജസ്റ്റിസ് ദേവന്‍ രാമചന്ദ്രന്‍ പറഞ്ഞു. ഇത്തരം പ്രവൃത്തി ചെയ്യുന്നവരെ പുറത്താക്കേണ്ടി വരുമെന്നും കോടതി മുന്നറിയിപ്പ് നല്‍കി.
കൊവിഡ് വ്യാപനത്തെ തുടര്‍ന്നാണ് കോടതികള്‍ ഓണ്‍ലൈന്‍ സിറ്റിംഗിലേക്ക് മാറിയത്. ഹൈക്കോടതിയും ഏറെ നാളായി ഓണ്‍ലൈന്‍ സിറ്റിംഗാണ് നടത്തുന്നത്.
