കോഴിക്കോട്: വഖഫ് നിയമനം പി.എസ്.സിക്ക് വിടാന്‍ സംസ്ഥാന സര്‍ക്കാര്‍ തീരുമാനിച്ച സമയത്ത് സമസ്ത സ്വീകരിച്ച നിലപാട് സംഘടനാ നിലപാടുകള്‍ക്കെതിരാണെന്ന് സമസ്തയില്‍ നിന്ന് പുറത്താക്കപ്പെട്ട ഹകിം ഫൈസി ആദൃശ്ശേരി. രാഷ്ട്രീയ കാര്യങ്ങളില്‍ ഇടപെടുന്ന പാരമ്പര്യം സമസ്തക്ക് ഇല്ലെന്നും സി.ഐ.സി ജനറല്‍ സെക്രട്ടറി കൂടിയായ ഫൈസി പറഞ്ഞു.
വിദ്യാഭ്യാസ കാര്യങ്ങളില്‍ നടപ്പാക്കിയ പരിഷ്‌കാരങ്ങളില്‍ പൊരുത്തപ്പെടാന്‍ കഴിയാത്തവരാണ് സംഘടനയില്‍ തനിക്കെതിരെയുള്ളതെന്നും ഫൈസി പറഞ്ഞു. മാതൃഭൂമി ന്യൂസിനോടായിരുന്ന അദ്ദേഹത്തിന്റെ പ്രതികരണം. വഖഫ് വിഷയത്തില്‍ മുസ്‌ലിം ലീഗായിരുന്നു പ്രതിഷേധം ലീഡ് ചെയ്യേണ്ടിയിരുന്നുവെന്നും ഫൈസി പറഞ്ഞു.
‘സര്‍ക്കാര്‍ കൊണ്ടുവരുന്ന ഒരു നിയമം, സര്‍ക്കാര്‍ നടത്തുന്ന ഒരു നിയമനം ഇതല്ലാം കൈകാര്യം ചെയ്യേണ്ടത് എം.എല്‍.എമാരും മന്ത്രിമാരുമടങ്ങിയ ഭരണപ്രതിപക്ഷമല്ലേ. വഖഫ് വിഷയങ്ങളിലെ ഇടപെടല്‍ സമസ്തയുടെ പ്രഖ്യാപിത നിലപാടുകള്‍ക്കെതിരായാണ് ഞാന്‍ മനസിലാക്കുന്നത്.
ജനാധിപത്യത്തില്‍ വോട്ട് ചെയ്ത് വിജയിപ്പിച്ചവരാണല്ലോ ജനപ്രതിനിധികള്‍. ഇവര്‍ സര്‍ക്കാര്‍ കാര്യങ്ങളില്‍ നയമസഭയില്‍ പ്രവര്‍ത്തിക്കുന്നവരാണ്. അവിടെയാണ് നിയമ നിര്‍മാണം നടക്കുന്നത്. അത്തരം വിഷയങ്ങള്‍ ജനപ്രതിനിധികള്‍ കൈകാര്യം ചെയ്യട്ടേ.
അതിലുള്ള മതപരമായ വിധികള്‍ സമസ്ത നോക്കിയാല്‍ മതിയാകും. അതിന്റെ രാഷ്ട്രീയപരമായ കാര്യങ്ങള്‍ പറയേണ്ടത് മുസ്‌ലിം ലീഗാണ്,’ ഹകിം ഫൈസി പറഞ്ഞു.
വഖഫ് ബോര്‍ഡിലെ നിയമനം പി.എസ്.സിക്ക് വിടാന്‍ സര്‍ക്കാര്‍ തീരുമാനിച്ചപ്പോള്‍ വലിയ സര്‍ക്കാര്‍ വിരുദ്ധ പ്രക്ഷോഭങ്ങളിലേക്കായിരുന്നു മുസ്‌ലിം ലീഗ് പോയിരുന്നത്. വിഷയത്തില്‍ പള്ളികളില്‍ പ്രതിഷേധമുണ്ടാകുമെന്ന് ലീഗ് സംസ്ഥാന ജനറല്‍ സെക്രട്ടറി പി.എം.എ. സലാം പറഞ്ഞത് അന്ന് വലിയ വാര്‍ത്തയായിരുന്നു.
എന്നാല്‍ പള്ളികള്‍ പ്രതിഷേധത്തിന് ഉപയോഗിക്കില്ലെന്നാണ് സമസ്ത സ്വീകരിച്ചിരുന്ന നിലപാട്. പി.എസ്.സി നിയമന വിഷയത്തില്‍ ലീഗ് പ്ലാറ്റഫോമിലല്ലാതെ സംഘടനാപരമായി തന്നെ തങ്ങളുടെ അതൃപ്തി
അറിയിക്കാനാണ് സമസ്ത അന്ന് ശ്രമിച്ചത്.
