ലിയോക്ക് ശേഷം വിജയ് അഭിനയിക്കുന്ന ചിത്രമാണ് ഗ്രേറ്റസ്റ്റ് ഓഫ് ഓള്‍ ടൈം(GOAT) വെങ്കട് പ്രഭു സംവിധാനം ചെയ്യുന്ന ചിത്രത്തിന്റെ ടൈറ്റിലും ഫസ്റ്റ് ലുക്കും പുതുവര്‍ഷദിനത്തില്‍ പുറത്തു വന്നിരുന്നു. സയന്‍സ് ഫിക്ഷന്‍ ചിത്രമാണെന്ന സൂചനയാണ് പോസ്റ്ററുകള്‍ നല്‍കുന്നത്. ചിത്രത്തിന്റെ പുതിയ പോസ്റ്റര്‍ പൊങ്കല്‍ ദിനത്തില്‍ പങ്കുവെച്ചിരിക്കുകയാണ് അണിയറപ്രവര്‍ത്തകര്‍.
‘ഗോട്ട് സ്‌ക്വാഡിനെ കണ്ടോളൂ, ബോക്‌സ് ഓഫീസിനെ തകര്‍ക്കാന്‍ അവര്‍ വരുന്നു’ എന്ന ക്യാപ്ഷനോടെയാണ് പോസ്റ്റര്‍ പുറത്തിറക്കിയത്. വിജയ്, പ്രശാന്ത്, പ്രഭുദേവ, അജ്മല്‍ അമീര്‍ എന്നിവര്‍ തോക്കുമേന്തി നില്‍ക്കുന്നതാണ് പോസ്റ്റര്‍.
https://x.com/archanakalpathi/status/1746770750290448763?s=20
കസ്റ്റഡി എന്ന ചിത്രത്തിന് ശേഷം വെങ്കട് പ്രഭു സംവിധാനം ചെയ്യുന്ന സിനിമയാണ് ഗ്രേറ്റസ്റ്റ് ഓഫ് ഓള്‍ ടൈം. മുമ്പ് അജിതിനെ നായകനാക്കി വെങ്കട് പ്രഭു ചെയ്ത മങ്കാത്ത എന്ന ചിത്രം 2011ലെ ഏറ്റവും വലിയ ഹിറ്റ് ആയിരുന്നു. ആരാധകര്‍ ഏറെ പ്രതീക്ഷയോടെ കാത്തിരിക്കുന്ന ചിത്രം 2024 ദീപാവലിക്ക് റിലീസാകുമെന്ന് കരുതുന്നു.
യുവന്‍ ശങ്കര്‍ രാജയാണ് ചിത്രത്തിന്റെ സംഗീതം. സിദ്ധാര്‍ത്ഥ നുനി ഛായാഗ്രഹണം നിര്‍വഹിക്കുന്നു. ജയറാം, സ്‌നേഹ, മീനാക്ഷി ചൗധരി, യോഗി ബാബു, വൈഭവ്, പ്രേംജി, അരവിന്ദ് ആകാശ് തുടങ്ങി വന്‍ താരനിര ചിത്രത്തിലുണ്ട്. എ.ജി.എസ് എന്റര്‍ടൈന്മെന്റ്‌സിന്റെ ബാനറില്‍ കല്‍പ്പാത്തി എസ് അഘോറാം, കല്‍പ്പാത്തി എസ് ഗണേശ്, കല്‍പ്പാത്തി എസ് സുരേഷ് എന്നിവരാണ് ചിത്രം നിര്‍മ്മിക്കുന്നത്.
Content Highlight: Greatest Of All Time Pongal special poster released