റോഷാക്കിന്റെ ലൊക്കേഷനില്‍വെച്ച് മമ്മൂട്ടിയുമായുള്ള അനുഭവം പങ്കുവെക്കുകയാണ് ഗ്രേസ് ആന്റണി. മമ്മൂട്ടി സെറ്റിലേക്ക് മറക്കാതെ തനിക്കുവേണ്ടി സ്‌പ്രെ കൊണ്ടുവന്നിരുന്നെന്നും അദ്ദേഹത്തിനോട് സംസാരിക്കുമ്പോള്‍ ഒരുപാട് കാര്യങ്ങള്‍ പറഞ്ഞു തരുമെന്നും ഗ്രേസ് പറഞ്ഞു. സീ ന്യൂസിന് നല്‍കിയ അഭിമുഖത്തിലാണ് മമ്മൂട്ടിയെക്കുറിച്ച് ഗ്രേസ് പറഞ്ഞത്.
”മമ്മൂക്കയെക്കുറിച്ച് ആളുകള്‍ പറഞ്ഞ് കേള്‍ക്കുമ്പോള്‍ അതെന്താണെന്ന് അറിയാനുള്ളൊരു ആഗ്രഹമുണ്ടായിരുന്നു. എല്ലാവര്‍ക്കും മമ്മൂക്കയെ കാണുന്നത് ഭയങ്കര പേടിയാണ്. പക്ഷേ എനിക്ക് അങ്ങനെയൊന്നുമല്ലായിരുന്നു. ഒരു നിമിഷം മമ്മൂക്കയോടൊപ്പം സംസാരിക്കുമ്പോള്‍ പത്തിരുപത് ഇന്‍ഫര്‍മേഷനാണ് നമുക്ക് ഇങ്ങോട്ട് കിട്ടുന്നത്. അദ്ദേഹത്തിന് അറിയാത്ത കാര്യമാണെങ്കിലും പിറ്റേ ദിവസം ഓര്‍ത്ത് വെച്ച് അതിനേക്കുറിച്ച് നമുക്ക് പറഞ്ഞു തരും.
ഷൂട്ടില്‍ ഞാനും അദ്ദേഹവും മാത്രമുള്ള ഒരു ഷോട്ട് എടുക്കുകയായിരുന്നു. ലൂക്കയും സുജാതയും മാത്രമുള്ള ഒരു വീടാണ്. അതുകൊണ്ട് ഞാനും അദ്ദേഹവും മാത്രമാണ് ആര്‍ട്ടിസ്റ്റുകളായി അവിടെ ഉള്ളു.
ഞങ്ങള്‍ എന്തോ പറഞ്ഞു തുടങ്ങി പെര്‍ഫ്യൂമിലെത്തി, പിന്നെ കറങ്ങി തിരിഞ്ഞ് ഊതിലെത്തി. ഊത് ഉണ്ടാക്കുന്നതെങ്ങനെയാണ് എന്നൊക്കെ പറഞ്ഞു തന്നു. ക്ലാസുകള്‍ കേള്‍ക്കുന്നപോലെ ഞാന്‍ അതെല്ലാം കേട്ട് നിന്നു.
അദ്ദേഹത്തിന്റെ കയ്യില്‍ ഊതിന്റെയും പെര്‍ഫ്യൂംസിന്റെയും കുറേ കളക്ഷന്‍സ് ഉണ്ടെന്നും നാളെ വരുമ്പോള്‍ കൊണ്ടുവരാമെന്നും പറഞ്ഞു. ഞാന്‍ ആ കാര്യം മറന്നുപോയിരുന്നു. പിറ്റേ ദിവസം എന്നോട് ചോദിച്ചു നിനക്ക് അതുവേണ്ടേന്ന്. എന്നിട്ട് അദ്ദേഹത്തിന്റെ മേക്കപ്പ് മാനിന്റെ അടുത്ത് നിന്നും അതു വാങ്ങിച്ച് എനിക്ക് സ്‌പ്രെ ചെയ്തു തന്നു. ഞാന്‍ മണത്തുനോക്കി ഇഷ്ടമായ കാര്യം പറഞ്ഞു.
എന്താണ് നിനക്ക് ഫീല്‍ ചെയ്തതെന്നൊക്കെ ചോദിച്ച് അതിനെക്കുറിച്ച് പറഞ്ഞു തന്നു. അതുകഴിഞ്ഞപ്പോള്‍ പിറ്റേ ദിവസം അടുത്ത പെര്‍ഫ്യൂമുമായി വന്നു. ഒരു അഞ്ചു ദിവസം അടുപ്പിച്ച് സ്‌പ്രെ കൊണ്ടുവന്നു.
ആളുകള്‍ മുഴുവന്‍ നേക്കുമ്പോള്‍ മമ്മൂക്ക എനിക്ക് സ്‌പ്രെ അടിച്ചോണ്ടിരിക്കുകയാണ്. നമുക്ക് ഒരു ടെന്‍ഷനുണ്ടാകില്ലെ, മറ്റുള്ളവര്‍ കാണുമ്പോള്‍ എന്ത് വിചാരിക്കുമെന്ന് ഓര്‍ത്തിട്ട്. മമ്മൂക്ക മറക്കാതെ അഞ്ചു ദിവസവും എനിക്ക് ഊത് കൊണ്ടുവന്നത് ഭയങ്കര അതിശയമായിരുന്നു.
അഞ്ചാമത്തെ ദിവസം അദ്ദേഹമെന്നോട് പറഞ്ഞു, നീ വിചാരിക്കുന്നുണ്ടാകും ഇത് നിനക്ക് വേണ്ടി കൊണ്ടുവന്നതാണെന്ന്. ഇത് എനിക്ക് വേണ്ടി അടിക്കാന്‍ കൊണ്ടു വന്നതാണ്. അതിന്റെ കൂട്ടത്തില്‍ നിനക്കും തരുന്നു അത്ര ഉള്ളു എന്ന് അദ്ദേഹം പറഞ്ഞു. എനിക്ക് തോന്നുന്നില്ല വേറെ ഒരാളും നമുക്ക് വേണ്ടി കറക്ടായി ഓര്‍ത്ത് ഓരോന്ന് കൊണ്ടുവരുമെന്ന്,” ആന്റണി പറഞ്ഞു.
content highlight: grace antony abot mammootty