കൊച്ചി: സ്വകാര്യ ലാബുകളിലെ ആര്‍.ടി.പി.സി.ആര്‍. നിരക്കുകള്‍ സര്‍ക്കാര്‍ കുറച്ചതിനെതിരെ സ്വകാര്യലാബുടമകള്‍ നല്‍കിയ അപ്പീല്‍ ഹൈക്കോടതി തള്ളി. നിരക്ക് കുറച്ച സര്‍ക്കാര്‍ ഉത്തരവില്‍ ഇടപെടേണ്ട സാഹചര്യമില്ലെന്നും മറ്റു പല സംസ്ഥാനങ്ങളിലും നിരക്ക് സമാനമാണെന്നും അപ്പീല്‍ ഹരജി തള്ളിയ ഡിവിഷന്‍ ബെഞ്ച് പറഞ്ഞു.
കഴിഞ്ഞ ദിവസമാണ് കേസില്‍ വാദം പൂര്‍ത്തിയായത്. ഐ.സി.എം.ആറിന്റെ മാര്‍ഗനിര്‍ദ്ദേശങ്ങള്‍ പ്രകാരമാണ് നിരക്ക് സംബന്ധിച്ച ഉത്തരവുകള്‍ ഇറക്കുന്നതെന്ന് കേന്ദ്രസര്‍ക്കാര്‍ കഴിഞ്ഞദിവസം കോടതിയെ അറിയിച്ചിരുന്നു.
നേരത്തെ ലാബുടമകള്‍ നല്‍കിയ ഹരജി ഹൈക്കോടതി സിംഗിള്‍ ബെഞ്ചും തള്ളിയിരുന്നു. ഇതിനെതിരെയാണ് ഡിവിഷന്‍ ബെഞ്ചില്‍ അപ്പീല്‍ പോയത്.
കൊവിഡ് പ്രതിസന്ധി ഘട്ടത്തില്‍ എയര്‍പോര്‍ട്ടില്‍ കുറഞ്ഞ നിരക്കില്‍ ആര്‍.ടി.പി.സി.ആര്‍. പരിശോധന നടത്തി സഹകരിക്കാന്‍ തീരുമാനിച്ചിരുന്നുവെന്നും ഇത് മുതലെടുത്താണ് സംസ്ഥാന സര്‍ക്കാര്‍ നിരക്ക് കുറച്ചതെന്നുമായിരുന്നു ലാബുടമകളുടെ വാദം.
ഡ്രഗ്‌സ് കണ്‍ട്രോളര്‍ക്കാണ് നിരക്ക് കുറയ്ക്കാന്‍ അധികാരമെന്നും നിരക്ക് കുറയ്ക്കുന്നതിന് മുമ്പ് തങ്ങളോട് അഭിപ്രായം ആരാഞ്ഞില്ലെന്നും ലാബുടമകള്‍ വാദിച്ചിരുന്നു.
എന്നാല്‍ മാനദണ്ഡങ്ങള്‍ പാലിച്ചാണ് നിരക്ക് കുറച്ചതെന്നും ഇതിന് സര്‍ക്കാരിന് അധികാരമുണ്ടെന്നും ഹൈക്കോടതിയെ സംസ്ഥാന സര്‍ക്കാര്‍ അറിയിച്ചു. ഇതോടെയാണ് അപ്പീല്‍ ഡിവിഷന്‍ ബെഞ്ച് തള്ളിയത്.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Government decision is right; High Court rejects lab owners’ appeal against rates of PCR test