ദല്‍ഹി: ഐ.എസ്.എല്‍ നാലാം സീസണില്‍ അഞ്ചാം മത്സരത്തിനിറങ്ങിയ എഫ്.സി ഗോവയ്ക്ക് ദല്‍ഹി ഡൈനാമോസിനെതിരെ തകര്‍പ്പന്‍ ജയം. ഒന്നിനെതിരെ അഞ്ചു ഗോളുകള്‍ക്കാണ് ഗോവയുടെ ജയം.
കോറോ (46), ലാന്‍സറോട്ടെ (48), അഡ്രിയാന്‍ കൊലുങ്ക (85), അരാന (88), പ്രീതം കോട്ടാല്‍ (സെല്‍ഫ് 84) എന്നിവര്‍ നേടിയ ഗോളുകളിലാണ് ഗോവയുടെ തകര്‍പ്പന്‍ ജയം. കാലു ഉചെയാണ് ഡല്‍ഹിക്കായി ആശ്വാസ ഗോള്‍ നേടിയത്. ടൂര്‍ണമെന്റില്‍ എട്ടു ഗോളുകളുമായി ഗോവയുടെ കോറോയാണ് ടോപ് സ്‌കോറര്‍.
കേരളത്തിനെതിരായ അഞ്ചു ഗോള്‍ വിജയത്തിനു പിന്നാലെയാണ് വീണ്ടും ഗോവയുടെ ഗോള്‍മഴ. ജയത്തോടെ 12 പോയിന്റുമായി ഗോവ ഒന്നാം സ്ഥാനത്തേക്കുയര്‍ന്നു.
ദല്‍ഹിയുടെ തുടര്‍ച്ചയായ മൂന്നാം തോല്‍വിയാണിത്. അഞ്ചു കളികളില്‍ നാലു തോല്‍വിയും ഒരു ജയവും മാത്രമുള്ള ഡല്‍ഹി ഒന്‍പതാം സ്ഥാനത്താണ്.