പനജി: ഗോവയില്‍ ഒറ്റയ്ക്കു ഭരിക്കാന്‍ സഖ്യകക്ഷികളെ ഒഴിവാക്കാനാരംഭിച്ച ബി.ജെ.പിക്കെതിരെ സഖ്യകക്ഷിയായ ഗോവ ഫോര്‍വേഡ് പാര്‍ട്ടി (ജി.എഫ്.പി). ബി.ജെ.പി സര്‍ക്കാരിനുള്ള പിന്തുണ തങ്ങള്‍ അവസാനിപ്പിക്കുന്നതായി പാര്‍ട്ടി പ്രസിഡന്റ് വിജയ് സര്‍ദേശായ് ഇന്ന് അറിയിച്ചു.
ഗവര്‍ണര്‍ മൃദുല സിന്‍ഹക്കയച്ച കത്തിലാണ് സര്‍ദേശായ് ഇക്കാര്യം വ്യക്തമാക്കിയത്. പാര്‍ട്ടിയുടെ തീരുമാനം ഐക്യകണ്‌ഠേനയാണെന്ന് അദ്ദേഹം കത്തില്‍ പറഞ്ഞു.
കോണ്‍ഗ്രസില്‍ നിന്നുള്ള 10 എം.എല്‍.എമാര്‍ ബി.ജെ.പിയിലേക്കു കഴിഞ്ഞദിവസം എത്തിയതോടെ അവര്‍ക്ക് ഒറ്റയ്ക്കു സര്‍ക്കാരുണ്ടാക്കാനുള്ള കേവല ഭൂരിപക്ഷമായിരുന്നു. നാല്‍പ്പതംഗ നിയമസഭയില്‍ 21 സീറ്റാണ് ഭൂരിപക്ഷത്തിനു വേണ്ടത്. 10 പേരുടെ വരവോടെ 27 സീറ്റായ ബി.ജെ.പി മന്ത്രിപദവിയിലുണ്ടായിരുന്ന ജി.എഫ്.പിയുടെ മൂന്നുപേരോടും ഒരു സ്വതന്ത്രനോടും രാജിവെയ്ക്കാന്‍ ആവശ്യപ്പെട്ടിരുന്നു.
പകരം കോണ്‍ഗ്രസില്‍ നിന്നെത്തിയ മൂന്നുപേര്‍ക്കും ഡെപ്യൂട്ടി സ്പീക്കര്‍ക്കും മന്ത്രിപദവി നല്‍കി. ഈ നീക്കമാണ് സഖ്യകക്ഷികളെ ചൊടിപ്പിച്ചത്.
