'സര്‍ക്കാരിന്റെ പിടിപ്പുകേടിനെക്കുറിച്ചുള്ള തല്‍സമയ വിവരണമാണിത്'; ജി.ഡി.പി ഇടിവ് മുന്നറിയിപ്പ് നല്‍കിയതിലും മോശം നിലയിലെന്ന് ചിദംബരം
ഡൂള്‍ന്യൂസ് ഡെസ്‌ക്
Saturday, 30th May 2020, 10:23 am
ന്യൂദല്‍ഹി: സാമ്പത്തിക വര്‍ഷത്തെ വളര്‍ച്ച പതിനൊന്ന് വര്‍ഷത്തെ ഏറ്റവും താഴ്ന്ന നിരക്കിലാണെന്ന റിപ്പോര്‍ട്ടുകള്‍ക്ക് പിന്നാലെ കേന്ദ്ര സര്‍ക്കാരിനെതിരെ വിമര്‍ശനമുന്നയിച്ച് കോണ്‍ഗ്രസ് നേതാവും മുന്‍ കേന്ദ്ര ധനമന്ത്രിയുമായ പി ചിദംബരം. പുതുതായി പുറത്തുവന്നിരിക്കുന്ന കണക്കുകള്‍ രാജ്യത്തെ സാമ്പത്തിക രംഗത്തെ പിടിപ്പുകേടിന്റെ തല്‍സമയ വിവരണമാണെന്ന് അദ്ദേഹം പറഞ്ഞു.
‘നാലാം പാദത്തിലെ മൊത്ത ആഭ്യന്തര ഉല്‍പാദനം നാല് ശതമാനത്തിലും താഴ്ന്ന നിലയിലെത്തുമെന്ന് ഞങ്ങള്‍ മുന്നറിയിപ്പ് നല്‍കിയിരുന്നു. എന്നാല്‍ അതിനേക്കാള്‍ മോശമായി 3.1 ശതമാനത്തിലേക്കാണ് വളര്‍ച്ച ഇടിഞ്ഞിരിക്കുന്നത്’, ചിദംബരം ട്വീറ്റ് ചെയ്തു.
ഇത് ലോക്ഡൗണ്‍ സമയത്തുണ്ടായ ഇടിവാണെന്ന് കരുതരുത്. നാലാം പാദത്തിലെ 91 ദിവസത്തില്‍ ഏഴ് ദിവസം മാത്രമാണ് ലോക്ഡൗണ്‍ സമയത്തേതെന്നും അദ്ദേഹം പറഞ്ഞു.
