അന്‍പുസെല്‍വനില്‍ അഭിനയിക്കുന്നില്ല; ഗൗതം മേനോന്റെ പ്രസ്താവനയ്ക്ക് പിന്നാലെ ചിത്രത്തിന്റെ പോസ്റ്റര്‍ പിന്‍വലിച്ച് പാ രഞ്ജിത്

അന്‍പുസെല്‍വന്‍ എന്ന സിനിമയില്‍ താന്‍ അഭിനയിക്കുന്നില്ലെന്ന് വ്യക്തമാക്കി സംവിധായകനും നടനുമായ ഗൗതം വാസുദേവ് മേനോന്‍. സംവിധായന്‍ പാ രഞ്ജിത് അന്‍പുസെല്‍വത്തിന്റെ ഫസ്റ്റ് ലുക്ക് പോസ്റ്റര്‍ എന്ന പേരില്‍ ഗൗതം മേനോന്റെ ചിത്രമടങ്ങിയ പോസ്റ്റര്‍ സോഷ്യല്‍ മീഡിയയില്‍ പങ്കുവെച്ചതിന് പിന്നാലെയായിരുന്നു താരത്തിന്റെ വിശദീകരണം.

പാ രഞ്ജിത് പങ്കുവെച്ച പോസ്റ്റര്‍ സോഷ്യല്‍ മീഡിയയില്‍ ശ്രദ്ധിക്കപ്പെട്ടതോടെയാണ് താന്‍ ഈ സിനിമയുടെ ഭാഗമല്ലെന്ന് ഗൗതം മേനോന്‍ തന്നെ വ്യക്തമാക്കിയത്. ഇതോടെ രഞ്ജിത് പോസ്റ്റര്‍ പിന്‍വലിക്കുകയായിരുന്നു.

”ഇത് എനിക്ക് തീര്‍ത്തും ഞെട്ടിപ്പിക്കുന്ന വാര്‍ത്തയാണ്. ഞാന്‍ അഭിനയിക്കാന്‍ പോകുന്നു എന്ന് പറയപ്പെടുന്ന ഈ സിനിമ എന്താണെന്നത് സംബന്ധിച്ച് എനിക്ക് ഒരു ധാരണയുമില്ല.

പോസ്റ്ററില്‍ പേരുള്ള ഇതിന്റെ സംവിധായകനെ ഞാന്‍ കണ്ടിട്ടില്ല. അത് ആരാണെന്നും എനിക്കറിയില്ല. ഇത്തരത്തിലൊരു കാര്യം എളുപ്പത്തില്‍ ചെയ്യാന്‍ സാധിക്കുന്നു എന്നത് തന്നെ പേടിപ്പെടുത്തുന്ന കാര്യമാണ്,” ഗൗതം മേനോന്‍ പോസ്റ്ററിന് മറുപടിയായി ട്വിറ്ററില്‍ കുറിച്ചു.

”ഇതാ അന്‍പുസെല്‍വന്റെ ഫസ്റ്റ്‌ലുക്ക് പോസ്റ്റര്‍, അത്രയും തീവ്രതയോടെ. ഗൗതം മേനോന്റെ ആക്ഷന്‍ പാക്കേജിനായി കാത്തിരിക്കുന്നു. സിനിമയ്ക്ക് എല്ലാ ആശംസകളും,” എന്നായിരുന്നു സിനിമയുടേതെന്ന തരത്തിലുള്ള പോസ്റ്റര്‍ പങ്കുവെച്ച് പാ രഞ്ജിത് നേരത്തെ ട്വിറ്ററില്‍ കുറിച്ചത്.

എ വിനോദ് കുമാര്‍ സംവിധാനം ചെയ്യുന്നു എന്ന് പറയപ്പെടുന്ന അന്‍പുസെല്‍വന്‍ എന്ന സിനിമയില്‍ ഗൗതം മേനോന്‍ ഒരു പൊലീസുകാരന്റെ വേഷത്തിലാണ് എത്തുന്നത് എന്നായിരുന്നു റിപ്പോര്‍ട്ടുകള്‍ പുറത്തുവന്നിരുന്നത്.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

Content Highlight: Gautham Menon says he is not part of the movie AnbuSelvan