ബോളിവുഡില്‍ സമീപകാലത്ത് ഇറങ്ങിയ ചിത്രങ്ങളില്‍ ഏറെ ശ്രദ്ധിക്കപ്പെട്ട ഒന്നാണ് “ഗാംഗ്‌സ് ഓഫ് വസേയ്പൂര്‍” . അനുരാഗ് കശ്യപ് സംവിധാനം ചെയ്ത ചിത്രം വന്‍ വിജയവുമായിരുന്നു. ഇപ്പോഴിതാ ഈ ചിത്രത്തിന്റെ രണ്ടാം ഭാഗം വരുന്നു.
“ഗാംഗ്‌സ് ഓഫ് വസേയ്പൂര്‍ 2” എന്ന പേരിലൊരുക്കിയ രണ്ടാം ഭാഗം ആഗസ്റ്റ് 8 ന് റിലീസ് ചെയ്യാനാണ് അനുരാഗ് കശ്യപിന്റെ തീരുമാനം. അനുരാഗ് കശ്യപ് ട്വിറ്ററിലൂടെയാണ് ഇക്കാര്യം അറിയിച്ചത്.
നസ്‌റുദ്ദീന്‍ സിദ്ദിഖി അവതരിപ്പിച്ച ഫൈസല്‍ ഖാന്‍ എന്ന കഥാപാത്രം രണ്ടാം ഭാഗത്തിലുമുണ്ടാവും. തന്റെ പിതാവിനെയും മുത്തച്ഛനെയും വധിച്ച രാമധീര്‍ സിങ്ങിനോട് ഫൈസല്‍ ഖാന്‍ പകരം വീട്ടുന്നതാണ് രണ്ടാം ഭാഗത്തിന്റെ പ്രമേയം.
ജൂണ്‍ 22നാണ് ചിത്രത്തിന്റെ ആദ്യഭാഗം തിയ്യേറ്ററുകളിലെത്തിയത്. അഞ്ച് മണിക്കൂര്‍ ദൈര്‍ഘ്യമുള്ള ചിത്രത്തിന്റെ രണ്ടാം ഭാഗം ജൂലൈ അവസാനം പുറത്തിറക്കാനായിരുന്നു നേരത്തെ തീരുമാനിച്ചത്. എന്നാല്‍ പിന്നീട് ആഗസ്റ്റ് 8ലേക്ക് നീട്ടുകയായിരുന്നു.
ചിത്രത്തിന്റെ രണ്ട് ഭാഗവും കഴിഞ്ഞ കാന്‍ ഫിലിം ഫെസ്റ്റിവെലില്‍ പ്രദര്‍ശിപ്പിച്ചിരുന്നു.