ന്യൂദല്‍ഹി: ഐ.പി.എല്‍ മത്സരത്തിലെ തോല്‍വിയ്ക്ക് പിന്നാലെ മാധ്യമപ്രവര്‍ത്തകന്റെ ചോദ്യത്തോട് പൊട്ടിത്തെറിച്ച് കിങ്സ് ഇലവന്‍ പഞ്ചാബ് നായകന്‍ ഗ്രെന്‍ മാക്സ്വെല്. മത്സരശേഷം നടത്തിയ വാര്‍ത്താസമ്മേളനത്തിലാണ് താരം മാധ്യമപ്രവര്‍ത്തകനോട് പൊട്ടിത്തെറിച്ചത്.
Also read ‘നിന്നെയൊന്നും വെടിവെച്ച് കൊന്നാല്‍ പോലും ഒരാളും ചോദിക്കില്ല’; കാശ്മീരി യുവാക്കളോട് ഇന്ത്യന്‍ സൈന്യം
വാര്‍ത്ത സമ്മേളനത്തില്‍ സ്പിന്‍ ബൗളര്‍മാര്‍ക്കെതിരെയുള്ള തന്റെ പ്രകടനത്തെ കുറിച്ചുള്ള മാധ്യമപ്രവര്‍ത്തകന്റെ ചോദ്യമാണ് താരത്തെ പ്രകോപിപ്പിച്ചത്. മാധ്യമപ്രര്‍ത്തകനോട് പൊട്ടിത്തെറിച്ച പഞ്ചാബ് നായകന്‍ ഉടന്‍ വാര്‍ത്ത സമ്മേളനം അവസാനിപ്പിച്ച് ഡ്രസ്സിംഗ് റൂമിലേക്ക് പോവുകയും ചെയ്തു.
ലെഗ് സ്പിന്നര്‍ക്കെതിരെയുള്ള പ്രകടനത്തെക്കുറിച്ചുള്ള മാധ്യമപ്രവര്‍ത്തകന്റെ ചോദ്യം മോശമായിരുന്നുവെന്നായിരുന്നു താരത്തിന്റെ പ്രതികരണം. “നിനക്കറിയാമോ കഴിഞ്ഞ മൂന്ന് കളികളില്‍ ലെഗ് സ്പിന്നര്‍മാര്‍ക്കെതിരെ ഞാന്‍ തുടര്‍ച്ചയായി സിക്‌സ് അടിച്ചത്”. എന്നായിരുന്നു താരത്തിന്റെ മറുപടി. മോശം ചോദ്യമാണിതെന്ന് വിളിച്ച് പറഞ്ഞു കൊണ്ടായിരുന്നു താരം ഡ്രസ്സിങ്റൂമിലേക്ക് പോയതും.
ദല്‍ഹിക്കെതിരായ മത്സരത്തില്‍ 51 റണ്‍സിനായിരുന്നു കിങ്സ് ഇലവന്‍ പഞ്ചാബ് തോറ്റത്. നേരിട്ട ആദ്യ പന്തില്‍ അമിത് മിശ്രയ്ക്ക് വിക്കറ്റ് നല്‍കി മാക്സ്വെല് പുറത്താവുകയും ചെയ്തിരുന്നു.
എന്നാല്‍ സീസണില്‍ മികച്ച പ്രകടനമാണ് താരം ഇതുവരെ കാഴ്ചവെച്ചത്. രണ്ടു മത്സരങ്ങളില്‍ പരാജയപ്പെട്ടെങ്കിലും ടീമിനെ മുന്നില്‍ നിന്ന് നയിക്കുകന്ന സമീപനമാണ് മാക്‌സ്‌വെല്ലിന്റെ ഭാഗത്ത് നിന്നും ഉണ്ടായത്.