അംബേദ്കറൈറ്റ് അശോക് ഭര്‍ത്തി മുതല്‍ ആക്ടിവിസ്റ്റ് ഉമര്‍ ഖാലിദ് വരെ; പെഗാസസ് ഫോണ്‍ ചോര്‍ത്തല്‍ പട്ടിക നീളുന്നു

ന്യൂദല്‍ഹി: ഇസ്രഈല്‍ ചാര സോഫ്റ്റ് വെയറായ പെഗാസസ് വഴി ഫോണ്‍ ചോര്‍ത്തപ്പെട്ടവരില്‍ ഉമര്‍ ഖാലിദ് ഉള്‍പ്പെടെയുള്ള ആക്ടിവിസ്റ്റുകളും. ദ വയറാണ് വാര്‍ത്ത റിപ്പോര്‍ട്ട് ചെയ്തിരിക്കുന്നത്.

അംബേദ്കറൈറ്റ് ആക്ടിവിസ്റ്റ് ആയ അശോക് ഭര്‍ത്തി, ജവഹര്‍ലാല്‍ നെഹ്‌റു സര്‍വ്വകലാശാലയിലെ മുന്‍ വിദ്യാര്‍ത്ഥികളും ആക്ടിവിസ്റ്റുകളുമായ ഉമര്‍ ഖാലിദ്, അനിര്‍ബന്‍ ഭട്ടാചാര്യ, ബന്‍ജ്യോത്സ്‌ന ലാഹിരി, മനുഷ്യാവകാശ പ്രവര്‍ത്തകരായ ബേല ഭാട്ടിയ, ശിവ ഗോപാല്‍ മിശ്ര, റെയില്‍വേ യൂണിയന്‍ നേതാവ് ശിവ് ഗോപാല്‍ മിശ്ര, മനുഷ്യാവകാശ പ്രവര്‍ത്തകന്‍ അന്‍ജാനി കുമാര്‍, ആന്റി കോള്‍ മൈനിംഗ് ആക്ടിവിസ്റ്റ് അലോക് ശുക്ല, ദല്‍ഹി സര്‍വ്വകലാശാല പ്രൊഫസര്‍ സരോജ് ഗിരി, ആക്ടിവിസ്റ്റ് ശുബ്രാന്‍ശു ചൗധരി ബീഹാറിലെ ആക്ടിവിസ്റ്റായ ഇപ്‌സ ശതക്ഷി എന്നിവരുടെ ഫോണും ചോര്‍ത്തിയിട്ടുണ്ടെന്ന് ദ വയര്‍ റിപ്പോര്‍ട്ട്‌ചെയ്യുന്നു.

ഫോണ്‍ ഹാക്ക് ചെയ്താണോ അതോ മറ്റേതെങ്കിലും രീതിയിലാണോ വിവരങ്ങള്‍ ചോര്‍ത്തിയതെന്ന് ഡിജിറ്റല്‍ ഫോറന്‍സിക് വിദഗ്ധ റിപ്പോര്‍ട്ടുകള്‍ വന്നതിന് ശേഷമേ പറയാന്‍ സാധിക്കൂ.

2019ല്‍ കര്‍ണാടകയിലെ കോണ്‍ഗ്രസ്-ജെ.ഡി.എസ്. നേതാക്കളുടെ ഫോണ്‍ രേഖകളും ചോര്‍ത്തിയതായി വെളിപ്പെടുത്തലുണ്ടായിരുന്നു. അന്നത്തെ കര്‍ണാടക ഉപമുഖ്യമന്ത്രിയായിരുന്ന പരമേശ്വരയുടെ ഫോണ്‍ ആണ് ചോര്‍ത്തിയത്.

സിദ്ധരാമയ്യ, എച്ച്.ഡി. കുമാരസ്വാമി തുടങ്ങിയവരുടെ സെക്രട്ടറിമാരുടെ ഫോണും ചോര്‍ന്നിട്ടുണ്ട്. കുമാരസ്വാമിയുടെ സുരക്ഷ ഉദ്യോഗസ്ഥന്റെ ഫോണും ചോര്‍ത്തപ്പെട്ടതായി രേഖകള്‍ പറയുന്നു. അന്നത്തെ മുഖ്യമന്ത്രിയായിരുന്ന എച്ച്.ഡി. കുമാരസ്വാമിയുടെ സെക്രട്ടറി സതീഷിന്റെ നമ്പറാണ് ലീക്ക് ചെയ്യപ്പെട്ടത്.

കര്‍ണാടകയില്‍ വലിയ രാഷ്ട്രീയ പ്രതിസന്ധി നിലനിന്നിരുന്ന കാലത്താണ് ഉപമുഖ്യമന്ത്രിയുടേതടക്കമുള്ള ഫോണ്‍ രേഖകള്‍ ചോര്‍ത്തിയതായുള്ള രേഖകള്‍ പുറത്ത് വരുന്നത്.

2019ലെ പ്രതിസന്ധിയ്ക്ക് ശേഷമാണ് കര്‍ണാടകയില്‍ ബി.എസ്. യെദിയൂരപ്പയുടെ നേതൃത്വത്തില്‍ ബി.ജെ.പി. അധികാരം പിടിച്ചെടുക്കുന്നത്.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

Content Highlight: From Ambedkerites to activists; Pegasus list of phone leaking is continuing