കോട്ടയം: ലൈംഗിക പീഡന പരാതി ഉയര്‍ന്ന വൈദികരുടെ ആഗോള പട്ടികയില്‍ ജലന്ധര്‍ ബിഷപ്പ് ഫ്രാങ്കോ മുളയ്ക്കലും. BishopAccountability.org എന്ന വെബ്‌സൈറ്റിലാണ് ഫ്രാങ്കോ മുളയ്ക്കലിന്റെ പേര് ചേര്‍ത്തിരിക്കുന്നത്.
ഇന്ത്യയില്‍ നിന്നും ലിസ്റ്റില്‍ പെടുന്ന ഏക ബിഷപ്പാണ് ഫ്രാങ്കോ മുളയ്ക്കല്‍. പീഡന സംഭവങ്ങള്‍ പുറത്തെത്തിക്കുന്നതിനും ഇരകള്‍ക്ക് നീതി നേടിക്കൊടുക്കുന്നതിനുമാണ് വെബ്‌സൈറ്റിന്റെ പ്രവര്‍ത്തനങ്ങള്‍.
ലോകത്തെമ്പാടുമുള്ള പീഡകരായ 85 ബിഷപ്പുമാരുടെ വിവരങ്ങളാണ് വെബ്‌സൈറ്റിലുള്ളത്. ഇതില്‍ 33 പേരുമായി അമേരിക്കയാണ് ഒന്നാമത്. ബാലപീഡകരായ ബിഷപ്പുമാരെ ചുവപ്പിലും മറ്റ് ലൈംഗികാരോപണം നേരിട്ടവരെ കറുപ്പിലുമാണ് വെബ്‌സൈറ്റ് അടയാളപ്പെടുത്തിയിരിക്കുന്നത്.
അതേ സമയം കന്യാസ്ത്രീയെ പീഡിപ്പിച്ചെന്ന കേസില്‍ ബിഷപ്പ് ഫ്രാങ്കോ മുളയ്ക്കല്‍ ബുധനാഴ്ച അന്വേഷണ സംഘത്തിന് മുന്നില്‍ ഹാജരാകാനിരിക്കുകയാണ്. അതിന് മുന്നോടിയായി തന്റെ ചുമതലകള്‍ അദ്ദേഹം താത്ക്കാലികമായി കൈമാറിയിരുന്നു. ചോദ്യം ചെയ്തുകഴിഞ്ഞാല്‍ അറസ്റ്റുണ്ടാവുമെന്ന സൂചനയുടെ അടിസ്ഥാനത്തില്‍ മുന്‍കൂര്‍ ജാമ്യം തേടിയായിരിക്കും ഫ്രാങ്കോ മുളയ്ക്കല്‍ ചോദ്യം ചെയ്യവിന് ഹാജരാവുകയെന്നും റിപ്പോര്‍ട്ടുകളുണ്ടായിരുന്നു.