ഫലസ്തീനോടുള്ള രാഷ്ട്രീയ പിന്തുണ; ഇസ്രാഈലിനെതിരെ മത്സരിക്കാന്‍ വിസമ്മതിച്ച് അള്‍ജീരിയന്‍ ജൂഡോ താരം ഒളിംപിക്‌സില്‍ നിന്ന് പിന്മാറി, സസ്‌പെന്‍ഷന്‍

ടോക്കിയോ: ഇസ്രാഈലുമായുള്ള മത്സരം വരാനുള്ള സാധ്യത കണക്കിലെടുത്ത് അള്‍ജീരിയന്‍ താരം ടോക്കിയോ ഒളിംപിക്‌സില്‍ നിന്ന് പിന്‍മാറി. അള്‍ജീരിയന്‍ ജൂഡോ താരം ഫതഹി നൗറിനാണ് പിന്‍മാറിയത്.

ഇസ്രാഈല്‍- ഫലസ്തീന്‍ പ്രശ്‌നത്തിന്‍ ഫലസ്തീനോടുള്ള രാഷ്ട്രീയ പിന്തുണയുടെ ഭാഗമായാണ് മത്സരത്തില്‍ നിന്ന് പിന്മാറുന്നതെന്ന് അദ്ദേഹം അറിയിച്ചു. നന്നായി പരിശ്രമിച്ചിട്ടാണ് ഒളിംപിക്‌സിലെത്തിയതെന്നും എന്നാല്‍ ഫലസ്തീന്‍ പോരാട്ടം അതിനേക്കാള്‍ വലുതാണെന്നും അദ്ദേഹം പറഞ്ഞു.

തിങ്കളാഴ്ച ആദ്യ റൗണ്ടില്‍ സുഡാന്‍ താരവുമായിട്ടായിരുന്നു ഫതഹി നൗറിന് ആദ്യ മത്സരം നിശ്ചയിച്ചിരുന്നത്. ഇത് ജയിച്ചാല്‍ അടുത്ത റൗണ്ടില്‍ ഇസ്രാഈലി താരവുമായി ഏറ്റുമുട്ടേണ്ടി വരുമെന്നതിനാലാണ് നൗറിന്‍ മത്സരത്തില്‍ നിന്ന് പിന്‍വാങ്ങിയത്.

അതേസമയം, ഇന്റര്‍നാഷണല്‍ ജൂഡോ ഫെഡറേഷന്‍ ഫതഹി നൗറിനെയും അദ്ദേഹത്തിന്റെ കോച്ച് അമര്‍ ബെനിഖ്‌ലഫിനെയും സസ്‌പെന്‍ഡ് ചെയ്തു. ഇരുവരുടെയും തീരുമാനം തങ്ങളുടെ ആശയങ്ങള്‍ക്ക് വിരുദ്ധമാണെന്ന് ഫെഡറേഷന്‍ പ്രസ്താവനയില്‍ അറിയിച്ചു.

ഇസ്രാഈലുമായുള്ള മത്സരം ഒഴിവാക്കാന്‍ 2019ല്‍ ടോക്കിയോയില്‍ നടന്ന ലോക ജൂഡോ ചാമ്പ്യന്‍ഷിപ്പില്‍ നിന്നും നൗറിന്‍ പിന്മാറിയിരുന്നു.

അതേസമയം, ടോക്കിയോ ഒളിംപിക്‌സില്‍  ഇന്ത്യക്ക് ആദ്യ മെഡല്‍ ലഭിച്ചു. ഭാരോദ്വാഹനത്തില്‍ മീരാഭായ് ചാനുവാണ് വെള്ളി മെഡല്‍ നേടിയത്. 49 കിലോ വിഭാഗത്തിലാണ് മെഡല്‍ നേടിയത്. ഭാരോദ്വാഹനത്തില്‍ മെഡല്‍ നേടുന്ന രണ്ടാമത്തെ ഇന്ത്യന്‍ താരമാണ് മീരാഭായ് ചാനു.

സ്നാച്ചില്‍ 84, 87 കിലോകള്‍ ഉയര്‍ത്തിയ ചാനുവിന് 89 കിലോ ഉയര്‍ത്താനായില്ല. ഇതോടെയാണ് രണ്ടാം സ്ഥാനത്തേക്ക് മാറിയത്. അതേസമയം ക്ലീന്‍ ആന്റ് ജെര്‍ക്കില്‍ 115 കിലോയാണ് മീരാഭായ് ചാനു ഉയര്‍ത്തിയത്.

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ 

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം

CONTENT HIGHLIGHTS:  For the Palestinian cause, an Algerian judoka refuses to face an opponent