തിരുവനന്തപുരം: കനത്തമഴയെത്തുടര്‍ന്നുണ്ടായ പ്രളയത്തില്‍ തിരുവനന്തപുരം ജില്ലയില്‍ വ്യാപക നാശനഷ്ടം. നഗരത്തിനടുത്ത് ഗൗരീശപട്ടത്ത് പതിനെട്ടോളം കുടുംബങ്ങള്‍ വെള്ളപ്പൊക്കത്തില്‍ ഒറ്റപ്പെട്ടു.
ഫയര്‍ഫോഴ്‌സ് സംഘം എത്തി ഈ കുടുംബങ്ങളെ രക്ഷിക്കാനുള്ള ശ്രമങ്ങള്‍ നടത്തിക്കൊണ്ടിരിക്കുകയാണ്. എന്നാല്‍ വെള്ളപ്പൊക്കം ശക്തമായതിനെത്തുടര്‍ന്ന് പ്രദേശത്തേക്ക് എത്താന്‍ കഴിയാത്ത സ്ഥിതിയാണ് ഇപ്പോള്‍ ഉള്ളത്.
ALSO READ: മലപ്പുറം പൈങ്ങോട്ടൂരില്‍ ഉരുള്‍പ്പൊട്ടല്‍; നിരവധി വീടുകള്‍ തകര്‍ന്നു
ഇന്ന് പുലര്‍ച്ചെ ആമയിഴഞ്ചാന്‍ തോട് കരകവിഞ്ഞൊഴുകാന്‍ തുടങ്ങിയിരുന്നു. ഇതാണ് ഈ പ്രദേശത്ത് ജലനിരപ്പ് ഉയരാന്‍ കാരണമായത്. പുലര്‍ച്ചെയായതിനാല്‍ പല കുടുംബങ്ങളും വെള്ളം പൊങ്ങിയത് അറിഞ്ഞിരുന്നില്ല.
ജില്ലയില്‍ പലഭാഗത്തും മണ്ണിടിച്ചില്‍ ഉണ്ടായിട്ടുണ്ട്. ബോണക്കാട് പ്രദേശത്ത് വെള്ളം കയറിയതിനെത്തുടര്‍ന്ന് നിരവധി പേരേ ദുരിതാശ്വാസ ക്യാംപുകളിലേക്ക് മാറ്റിയിട്ടുണ്ട്.