നിശ്ചിത അംഗങ്ങള്‍ സംഘടനയില്‍ വേണമെന്ന് ഫിയോകിന് നിര്‍ബന്ധമില്ല. ഫിയോകിന്റെ അംഗ സംഖ്യ വര്‍ധിപ്പിക്കാന്‍ ഒരു ഉദ്ദേശവുമില്ല. എത്ര പേര്‍ സംഘടനക്കൊപ്പം നില്‍ക്കുന്നു എന്നതാണ് പ്രാധാനമെന്നും വിജയകുമാര്‍ പറഞ്ഞു.

കേശു ഈ വീടിന്റെ നാഥന്‍ എന്ന സിനിമ ഒ.ടി.ടിയില്‍ പോയതില്‍ സംഘടനയോട് സംസാരിച്ചിട്ടുണ്ട്. അതേപോലെയല്ല ദുല്‍ഖര്‍ സല്‍മാന്റെ സല്യൂട്ട്. അത് തിയേറ്ററിന് പറഞ്ഞുറപ്പിച്ചതിന് ശേഷം ഒ.ടി.ടിക്ക് നല്‍കുകയായിരുന്നു. എന്നാല്‍, ദുല്‍ഖര്‍ സല്‍മാന്റെ കുറുപ്പ് എന്ന സിനിമ ഒ.ടി.ടിക്ക് തീരുമാനിച്ചതിന് ശേഷം പിന്നീട് തിയേറ്ററിന് നല്‍കുകയായിരുന്നെന്നും വിജയകുമാര്‍ കൂട്ടിച്ചേര്‍ത്തു.

അതേസമയം, നടന്‍ ദുല്‍ഖര്‍ സല്‍മാനെതിരെ ഫിയോക് ഏര്‍പ്പെടുത്തിയ വിലക്ക് പിന്‍വലിച്ചു. ദുല്‍ഖറിന്റെ നിര്‍മാണക്കമ്പനിയായ വേഫെറര്‍ നല്‍കിയ വിശദീകരണത്തെ തുടര്‍ന്നാണ് വിലക്ക് പിന്‍വലിച്ചത്.

പ്രത്യേക സാഹചര്യത്തിലാണ് സല്യൂട്ട് ഒ.ടി.ടിക്ക് നല്‍കിയതെന്നും തുടര്‍ന്നുള്ള ചിത്രങ്ങള്‍ തിയേറ്റര്‍ റിലീസ് ആകുമെന്നും കമ്പനി അറിയിച്ചു. ദുല്‍ഖര്‍ സല്‍മാന്‍ നിര്‍മിച്ച ‘സല്യൂട്ട്’ എന്ന സിനിമ ഒ.ടി.ടി റിലീസ് ചെയ്യാനുള്ള തീരുമാനത്തെ തുടര്‍ന്നായിരുന്നു വിലക്കേര്‍പ്പെടുത്തിയത്. ധാരണകളും വ്യവസ്ഥകളും ലംഘിച്ചാണ് സല്യൂട്ട് ഒ.ടി.ടിക്ക് നല്‍കിയതെന്നായിരുന്നു ഫിയോക് ആരോപിച്ചത്.

Content Highlights:  Fiyok President says If Minnal Murali had been released in theaters, Naradan would not have had this misfortune