വിശക്കുന്നവന് അന്നം കൊടുത്തത് ഇടത് തരംഗത്തിന് കാരണമായി: ഫിറോസ് കുന്നുംപറമ്പില്‍
ഡൂള്‍ന്യൂസ് ഡെസ്‌ക്
Tuesday, 4th May 2021, 5:24 pm
മലപ്പുറം: മുഖ്യമന്ത്രി പിണറായി വിജയനെ പ്രകീര്‍ത്തിച്ച് തവനൂരിലെ യു.ഡി.എഫ് സ്ഥാനാര്‍ത്ഥി ഫിറോസ് കുന്നുംപറമ്പില്‍. വിശക്കുന്നവന് അന്നം കൊടുത്തത് കേരളത്തില്‍ ഇടത് തരംഗത്തിന് കാരണമായെന്നും. ഇത് കാണാതെ പോകരുതെന്നും ഫിറോസ് പറഞ്ഞു.
തവനൂരില്‍ ജലീലിനെതിരെ ശക്തമായ വികാരം ഉണ്ടായിരുന്നെന്നും എന്നാല്‍ ഇടത് തരംഗത്തില്‍ മാത്രമാണ് ജലീല്‍ ജയിച്ചുകയറിയതെന്നും ഫിറോസ് പറഞ്ഞു.
‘യുവാക്കള്‍ക്കും പുതുമുഖങ്ങള്‍ക്കും ഇടത് മുന്നണി പ്രാധാന്യം നല്‍കി. മന്ത്രിസഭയിലും പുതുമുഖങ്ങളെ ഉള്‍പ്പെടുത്തുന്നത് മാതൃകാപരമാണ്,’ ഫിറോസ് കൂട്ടിച്ചേര്‍ത്തു.
ഫിറോസ് കുന്നുംപറമ്പിലിനെ സിറ്റിംഗ് എം.എല്‍.എയും മുന്‍ മന്ത്രിയുമായിരുന്ന കെ.ടി ജലീല്‍ 3,606 വോട്ടുകള്‍ക്കാണ് പരാജയപ്പെടുത്തിയത്. 2011ല്‍ തവനൂര്‍ മണ്ഡലം രൂപീകരിച്ച ശേഷം നടന്ന രണ്ടു തെരഞ്ഞെടുപ്പുകളിലും ജലീലിനൊപ്പമായിരുന്നു വിജയം.
