വീണ്ടും തട്ടിപ്പ് വിവാദത്തില്‍ ലീഗ്; വിദ്യാഭ്യാസ കിറ്റിന് പിരിച്ച തുക എം.എസ്.എഫ് ദേശീയ അധ്യക്ഷന്‍ പോക്കറ്റിലാക്കിയെന്ന് ആരോപണം
ഡൂള്‍ന്യൂസ് ഡെസ്‌ക്
Friday, 12th March 2021, 10:18 am
കോഴിക്കോട്: എം.എസ്.എഫ് ദേശീയ അധ്യക്ഷന്‍ ടി.പി അഷ്‌റഫലിക്കെതിരെ സാമ്പത്തിക തട്ടിപ്പ് ആരോപണവുമായി മുസ്‌ലിം ലീഗ് മുന്‍ ദേശീയ കമ്മിറ്റിയംഗം യൂസഫ് പടനിലം. ഉത്തരേന്ത്യയിലെ നിര്‍ധന കുടുംബംഗങ്ങളിലെ കുട്ടികളുടെ വിദ്യാഭ്യാസത്തിനായി പിരിച്ച തുക സ്വന്തം അക്കൗണ്ടിലേക്ക് അഷ്‌റഫലി വക മാറ്റിയെന്നാണ് ആരോപണം.
ഇതോടെ കത്‌വാ കേസില്‍ പെണ്‍കുട്ടിയുടെ കുടുംബത്തിന് വേണ്ടി പിരിച്ച തുക വകമാറ്റിയെന്ന വിവാദത്തിലായ മുസ്‌ലിം ലീഗ് വീണ്ടും പ്രതിരോധത്തിലായിരിക്കുകയാണ്.
ഉത്തരേന്ത്യന്‍ സംസ്ഥാനങ്ങളിലെ പിന്നാക്ക വിദ്യാര്‍ത്ഥികള്‍ക്ക് 500 രൂപയുടെ വിദ്യാഭ്യാസ കിറ്റ് നല്‍കാന്‍ പിരിച്ച ലക്ഷങ്ങള്‍ എം.എസ്.എഫ് ദേശീയ അധ്യക്ഷന്‍ സ്വന്തം അക്കൗണ്ടിലേക്ക് മാറ്റിയെന്ന ഗുരുതര ആരോപണമാണ് ഇപ്പോള്‍ ഉയര്‍ന്നിരിക്കുന്നത്.
