'ഒരു കമ്പനിക്ക് മാത്രമാണ് ഇന്നത്തെ പ്രഖ്യാപനത്തില്‍ നേട്ടം, ഇതാണ് ആത്മ നിര്‍ഭര്‍ ഭാരത്'; നിര്‍മ്മല സീതാരാമനെ പരിഹസിച്ച് കോണ്‍ഗ്രസ്
ഡൂള്‍ന്യൂസ് ഡെസ്‌ക്
Saturday, 16th May 2020, 11:16 pm
ന്യൂദല്‍ഹി: രാജ്യം മുഴുവന്‍ അതിഥി തൊഴിലാളികളുടെ അതീജീവന പ്രശ്‌നം നിലനില്‍ക്കേ വ്യോമയാന മേഖലയും സ്വകാര്യവത്കരിക്കുമെന്ന ധനമന്ത്രി നിര്‍മ്മല സീതാരാമന്റെ പ്രഖ്യാപനത്തെ പരിഹസിച്ച് കോണ്‍ഗ്രസ്. വിചിത്രമാണ് നിര്‍മ്മല സീതാരാമന്റെ പ്രഖ്യാപനമെന്ന് ജയ്‌റാം രമേഷ് ട്വീറ്റ് ചെയ്തു.
ഒരു കമ്പനിക്ക് മാത്രമാണ് ഇന്നത്തെ പ്രഖ്യാപനത്തില്‍ നേട്ടം, ഇതാണ് ആത്മ നിര്‍ഭര്‍ ഭാരത് എന്ന് മറ്റൊരു ട്വീറ്റില്‍ ജയ്‌റാം രമേഷ് പറഞ്ഞു. അതിഥി തൊഴിലാളികള്‍ സുരക്ഷിതരായി വീട്ടിലെത്തിയിട്ടില്ല, ധനമന്ത്രി ബഹിരാകാശ പര്യവേഷണം തുറന്നു കൊടുക്കുന്നതിനെ കുറിച്ചും ബഹിരാകാശം സ്വകാര്യ മേഖലയ്ക്ക് കൊടുക്കുന്നതിനെ ചൊല്ലിയൊക്കെയാണ് പറയുന്നത്, വിചിത്രം എന്നും ജയ്‌റാം രമേഷ് പറഞ്ഞു.
