'പുരുഷന്മാര്‍ കേന്ദ്ര കഥാപാത്രമാകുമ്പോള്‍ ആണത്തം അതിന്റെ ഭാഗം,പൊളിറ്റിക്കലി കറക്ടാകാന്‍ ഞാന്‍ ശ്രമിച്ചിട്ടില്ല'; നിതിന്‍ രണ്‍ജി പണിക്കര്‍

സുരേഷ് ഗോപി നായകനാകുന്ന പുതിയ ചിത്രം കാവലില്‍ പൊളിറ്റിക്കലി കറക്ടാകാന്‍ ബോധപൂര്‍വ്വം ഒരു ശ്രമവും നടത്തിയിട്ടില്ലെന്ന് സംവിധായകന്‍ നിതിന്‍ രണ്‍ജി പണിക്കര്‍. ടൈംസ് ഓഫ് ഇന്ത്യക്ക് നല്‍കിയ അഭിമുഖത്തിലാണ് നിതിന്റെ പരാമര്‍ശം. കസബയിലെ സ്ത്രീവിരുദ്ധ പരാമര്‍ശത്തിന്റെയും ബന്ധപ്പെട്ടുണ്ടായ വിവാദത്തിന്റെയും പശ്ചാത്തലത്തില്‍ കാവലിന്റെ തിരക്കഥ എങ്ങനെയാണ് ഒരുക്കിയിരിക്കുന്നത് എന്ന ചോദ്യത്തിന് മറുപടി നല്‍കുമ്പോഴാണ് പൊളിറ്റിക്കല്‍ കറക്ടനസിനെക്കുറിച്ച് നിതിന്‍ സംസാരിച്ചത്.

കസബയില്‍ നിന്നും ഏറെ വ്യത്യസ്തമാണ് കാവലിലെ കഥാപാത്രമെന്നും വ്യക്തിബന്ധങ്ങള്‍ വിഷയമാവുന്ന ചിത്രത്തില്‍ പൊളിറ്റിക്കലി കറക്ടാകാന്‍ ഒന്നുമില്ലെന്നും നിതിന്‍ പറഞ്ഞു. ‘പൊളിറ്റിക്കലി കറക്ടാകാന്‍ ഞാന്‍ മനപ്പൂര്‍വ്വം ഒരു ശ്രമവും നടത്തിയിട്ടില്ല. അതിനുവേണ്ടി ഒന്നും ബോധപൂര്‍വ്വം ഒഴിവാക്കിയിട്ടുമില്ല.’ നിതിന്‍ പറഞ്ഞു.

ബോളിവുഡ്, ഹോളിവുഡ് തുടങ്ങി ഏത് സിനിമാമേഖലയിലായാലും പുരുഷന്മാര്‍ കേന്ദ്ര കഥാപാത്രങ്ങളെ അവതരിപ്പിക്കുമ്പോള്‍ ആണത്തം അതിന്റെ ഭാഗമായിരിക്കുമെന്നും നിതിന്‍ കൂട്ടിച്ചേര്‍ത്തു.

‘ബോണ്ടിലും ബാറ്റ്മാനിലുമൊക്കെ നമ്മള്‍ ഇത് കണ്ടതാണ്. ഞാന്‍ ഒരു താരത്തിനോടൊപ്പം കൊമേഴ്‌സ്യല്‍ സിനിമ ചെയ്യുമ്പോള്‍ ആ അഭിനേതാവിനെ പരമാവധി ഉപയോഗപ്പെടുത്താനാണ് നോക്കുന്നത്. അങ്ങനെ തന്നെയാണ് ഞാന്‍ നേരത്തെയും ചെയ്തിട്ടുള്ളത്. സിനിമ കണ്ട ശേഷം അതില്‍ ആര്‍ക്കെങ്കിലും പ്രശ്‌നം തോന്നുകയോ അനിഷ്ടം തോന്നുകയോ ചെയ്താല്‍ അതില്‍ എനിക്ക് ഒന്നും ചെയ്യാനാകില്ല. ആളുകള്‍ക്ക് ഇഷ്ടമാകും എന്ന ധാരണയിലാണ് സിനിമ ചെയ്യുന്നത്. ചിലപ്പോള്‍ അത് ശരിയാകും ചിലപ്പോള്‍ തെറ്റും. പുലി മുരുകനും കുമ്പളങ്ങി നൈറ്റ്‌സും ഒരുപോലെ സ്വീകരിച്ചവരാണ് മലയാളി പ്രേക്ഷകർ. അതുകൊണ്ട് ഒന്നും പ്രവചിക്കാനാകില്ല.’ നിതിന്‍ പറയുന്നു.

നിതിന്‍ സംവിധാനം ചെയ്ത കസബയിലെ സ്ത്രീവിരുദ്ധ പരാമര്‍ശങ്ങള്‍ മലയാള സിനിമയില്‍ ഒട്ടേറെ വിവാദങ്ങള്‍ വഴി വെച്ചിരുന്നു. സിനിമയില്‍ മമ്മൂട്ടിയുടെ പൊലീസ് കഥാപാത്രം ഒരു സീനില്‍ സഹപ്രവര്‍ത്തകയോട് നടത്തുന്ന ഡയലോഗിലെ സ്ത്രീവിരുദ്ധത തുറന്നുപറഞ്ഞുകൊണ്ട് നടി പാര്‍വതിയും മറ്റു നടിമാരും രംഗത്തെത്തിയതിന് പിന്നാലെയായിരുന്നു ഇതേ കുറിച്ച് വിശദമായ ചര്‍ച്ചകള്‍ നടന്നത്.

കസബയ്ക്ക് ശേഷം നിതിന്‍ രണ്‍ജി പണിക്കര്‍ സംവിധാനം ചെയ്യുന്ന ചിത്രമാണ് കാവല്‍. ചിത്രത്തിന്റെ തിരക്കഥ ഒരുക്കിയിരിക്കുന്നതും നിതിനാണ്.
ഗുഡ്വില്‍ എന്റര്‍ടെയ്ന്‍മെന്റ്സിന്റെ ബാനറില്‍ ജോബി ജോര്‍ജാണ് ചിത്രം നിര്‍മിക്കുന്നത്. സുരേഷ് ഗോപിയുടെ ശക്തമായ രണ്ടാംവരവായാണ് കാവലിനെ ആരാധകര്‍ കാത്തിരിക്കുന്നത്.

ഹൈറേഞ്ച് പശ്ചാത്തലത്തില്‍ ഒരുക്കുന്ന ചിത്രത്തില്‍ രണ്ട് കാലഘട്ടങ്ങളിലായി രണ്ട് ഗെറ്റപ്പിലാണ് സുരേഷ് ഗോപി എത്തുന്നത്. ഐ.എം.വിജയന്‍, മുത്തുമണി, പത്മരാജ് രതീഷ്, അലന്‍സിയര്‍, സയ ഡേവിഡ്, സന്തോഷ് കീഴാറ്റൂര്‍,സുജിത് ശങ്കര്‍ തുടങ്ങിയ താരങ്ങളും ചിത്രത്തിലുണ്ട്. നിഖില്‍ എസ്. പ്രവീണാണ് ഛായാഗ്രഹണം.

ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും  ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക

ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ

Content Highlight: Director Nithin Renji Panicker says he has not tried to be politically correct in Kasaba and new movie Kaval