കൊച്ചി: സിനിമാ എഡിറ്റര്‍ നിഷാദ് യൂസഫ് അന്തരിച്ചു. എറണാകുളം പനമ്പള്ളി നഗറിലെ ഫ്‌ളാറ്റില്‍ പുലര്‍ച്ചെ നാല് മണിയോടെയാണ് നിഷാദിനെ മരിച്ച നിലയില്‍ കണ്ടെത്തിയത്. ഉണ്ട, ചാവേര്‍, സൗദി വെള്ളക്ക, ഓപ്പറേഷന്‍ ജാവ തുടങ്ങി നിരവധി ഹിറ്റ് ചിത്രങ്ങളില്‍ എഡിറ്ററാണ് നിഷാദ് യൂസഫ്. ഖാലിദ് റഹ്‌മാന്‍ സംവിധാനം ചെയ്ത തല്ലുമാല എന്ന ചിത്രത്തിലെ എഡിറ്റിങ്ങിന് ആ വര്‍ഷത്തെ സംസ്ഥാന അവാര്‍ഡ് നിഷാദിനെ തേടിയെത്തിയിരുന്നു.

കേരളത്തിന് പുറത്തും ഒട്ടേറെ ചര്‍ച്ചചെയ്യപ്പെട്ട തല്ലുമാല നിഷാദിന് മലയാളത്തിന് പുറത്തും അവസരങ്ങള്‍ നേടിക്കൊടുത്തു. സൂര്യ നായകനായ കങ്കുവയിലേക്ക് നിഷാദ് എത്തിയത് തല്ലുമാല കാരണമായിരുന്നു. കങ്കുവക്ക് പുറമെ സൂര്യയെ നായകനാക്കി ആര്‍.ജെ. ബാലാജി സംവിധാനം ചെയ്യുന്ന സൂര്യ 45ലും നിഷാദിനെയായിരുന്നു എഡിറ്ററായി നിശ്ചയിച്ചിരുന്നത്.

നിഷാദിന്റെ മരണം ആത്മഹത്യയാണെന്നാണ് പൊലീസ് നിഗമനം. പങ്കാളിയും രണ്ടു മക്കളുമായി പനമ്പള്ളി നഗറിലെ ഫ്‌ളാറ്റില്‍ കഴിയുകയായിരുന്നു നിഷാദ്. ആത്മഹത്യയുടെ കാരണം വ്യക്തമല്ലെന്നാണ് പൊലീസ് പറയുന്നത്.

Content Highlight: Film Editor Nishad Yousuf found dead on his flat