ഫാറ്റ് സ്ത്രീകളെക്കാള്‍ ബാധിക്കുന്നത് പുരുഷന്മാരെ

[]ഫാറ്റ് ധാരാളമുള്ള ഭക്ഷണം കഴിക്കുന്ന സ്ത്രീകള്‍ക്കൊരു ആശ്വാസ വാര്‍ത്ത. ധാരാളം ഫാറ്റുള്ള ഭക്ഷണങ്ങള്‍ സ്ത്രീകളേക്കാള്‍ പുരുഷന്മാരെയാണ് രോഗികളാക്കുന്നതെന്നാണ് ഗവേഷകര്‍ പറയുന്നത്. ഫാറ്റ് അധികമുള്ള ഭക്ഷണങ്ങളോട് സ്ത്രീകളുടെയും പുരുഷന്മാരുടെയും തലച്ചോറുകള്‍ പ്രതികരിക്കുന്നത് വ്യത്യസ്തമായ രീതിയിലാണെന്നാണ് ഇവരുടെ കണ്ടെത്തല്‍. ഈസ്‌ട്രോജന്റെ അളവുമായാണ് ഇത് ബന്ധപ്പെട്ട് കിടക്കുന്നതെന്നും ഇവര്‍ പറയുന്നു.

ഇതാദ്യമായാണ് സ്ത്രീ-പുരുഷ ശരീരം വ്യത്യസ്തമായാണ് ഫാറ്റുള്ള ആഹാരങ്ങളോട് പ്രതികരിക്കുന്നതെന്ന് കണ്ടെത്തുന്നതെന്നാണ് ഗവേഷകരുടെ അവകാശവാദം. ലോസ് ഏഞ്ചല്‍സിലെ സെഡാര്‍ സിനൈ മെഡിക്കല്‍ സെന്ററിലെ ഗവേഷകരുടേതാണ് ഈ കണ്ടെത്തല്‍.

ധാരാളം ഫാറ്റ് അടങ്ങിയ ഭക്ഷണങ്ങളോടുള്ള തലച്ചോറിന്റെ വ്യത്യസ്തമായ പ്രതികരണം പുരുഷന്മാരില്‍ ആരോഗ്യപ്രശ്‌നങ്ങള്‍ ഉണ്ടാക്കും. സ്ത്രീകളില്‍ താരതമ്യേന ഇതിനുള്ള സാധ്യത കുറവാണെന്നും ഗവേഷകര്‍ വാദിക്കുന്നു.

“സ്ത്രീകള്‍ വല്ലപ്പോഴും ധാരാളം ഫാറ്റുള്ള ആഹാരങ്ങള്‍ കഴിക്കുന്നതില്‍ തെറ്റില്ല. എന്നാല്‍ പുരുഷന്മാര്‍ക്ക് ഇത് നിര്‍ദേശിക്കാനേ പാടില്ല.” ഗവേഷകരിലൊരാളായ ഡെബോറ ക്ലെഗ് പറഞ്ഞു.

എലികളിലാണ് ഇതിനെക്കുറിച്ച് പരീക്ഷണം നടത്തിയത്. ആണ്‍ എലികളെ അപേക്ഷിച്ച്  പെണ്‍ എലികളുടെ തലച്ചോറ് ഫാറ്റിന്റെ ദൂഷ്യഫലങ്ങളില്‍ നിന്ന് സംരക്ഷിക്കപ്പെടുന്നതായി കണ്ടെത്തുകയായിരുന്നു. ഈ കണ്ടെത്തല്‍ മനുഷ്യരുടെ കാര്യത്തിലും ശരിയാണെന്ന് സ്ഥിരീകരിക്കുന്നതിനുള്ള ഗവേഷണങ്ങളില്‍ മുഴുകിയിരിക്കുകയാണിവര്‍.