രാഷ്ട്രീയം പറയേണ്ടിടത്ത് ചാരിറ്റി പറഞ്ഞു, കുഞ്ഞാലിക്കുട്ടിയുടെ തിരിച്ചുവരവ് തിരിച്ചടിച്ചു; ലീഗ് നേതൃത്വത്തിനെതിരെ ആഞ്ഞടിച്ച് ഫറൂഖ് കോളെജ് എം.എസ്.എഫ് കൂട്ടായ്മ
ഡൂള്‍ന്യൂസ് ഡെസ്‌ക്
Saturday, 2nd October 2021, 12:27 pm
കോഴിക്കോട്: മുസ്‌ലിം ലീഗ് നേതൃത്വത്തിനെതിരെ രൂക്ഷവിമര്‍ശനവുമായി ഫറൂഖ് കോളെജ് എം.എസ്.എഫ് കൂട്ടായ്മ 2001-10. ലീഗില്‍ തിരുത്തല്‍ വേണമെന്നാവശ്യപ്പെട്ട് 23 പേജുള്ള നിര്‍ദേശങ്ങളാണ് കൂട്ടായ്മ പുറത്തിറക്കിയിരിക്കുന്നത്.
‘ലീഗ് അതിന്റെ അടിസ്ഥാന തത്വങ്ങളേയും ഭരണഘടനയേയും മറന്നുതുടങ്ങിയിരിക്കുന്നു. മുസ്‌ലിം ലീഗ് അതിന്റെ സുഗമമായ പ്രവര്‍ത്തനങ്ങള്‍ക്കായി ഭരണഘടനാധിഷ്ഠിതമായി പ്രവര്‍ത്തിക്കേണ്ടതുണ്ട്,’ നിര്‍ദേശത്തില്‍ പറയുന്നു.
ലീഗില്‍ എല്ലാ യോഗങ്ങളും തീരുമാനങ്ങളും ഉന്നതാധികാര സമിതിയിലേക്ക് ചുരുങ്ങുന്നതായി കൂട്ടായ്മ വിമര്‍ശിക്കുന്നു. രാഷ്ട്രീയം പറയേണ്ടിടത്ത് ചാരിറ്റി പറഞ്ഞ് മുഖം മറയ്‌ക്കേണ്ട അവസ്ഥ ലീഗിനുണ്ടായെന്നും കൂട്ടായ്മ പറയുന്നു.
മുതിര്‍ന്ന നേതാക്കളുടെ ഡ്രൈവര്‍മാര്‍ ഉള്‍പ്പടെയുള്ള ഉപജാപസംഘങ്ങള്‍ പാര്‍ട്ടിയുടെ വക്താക്കളാകുന്ന സ്ഥിതിയുണ്ടായി.
