പി.എസ്.ജിയുടെയും ഫ്രഞ്ച് ദേശീയ ടീമിന്റെയും മുൻ നിര താരമായ കിലിയൻ എംബാപ്പെയെ തങ്ങളുടെ തട്ടകത്തിലെത്തിക്കാൻ സ്പാനിഷ് ക്ലബ്ബായ റയൽ മാഡ്രിഡ് വലിയ ശ്രമങ്ങൾ നടത്തിയിരുന്നു. ഇപ്പോൾ റയലിന്റെ മുന്നേറ്റ നിരയെ നയിക്കുന്ന കരീം ബെൻസെമയുടെ പിൻഗാമിയായാണ് താരത്തെ തങ്ങളുടെ ക്യാമ്പിലെത്തിക്കാൻ റയൽ ശ്രമിച്ചിരുന്നത്.
എന്നാൽ തങ്ങളുടെ ടീമിന്റെ ആക്രമണ നിരയുടെ കുന്തമുനയായ എംബാപ്പെയെ കൂടുതൽ പ്രതിഫലവും ടീമിൽ കൂടുതൽ സ്ഥാനവും നൽകി പി.എസ്.ജി കരാർ നീട്ടുകയായിരുന്നു.
ജനുവരി ട്രാൻസ്ഫർ വിൻഡോയിൽ എംബാപ്പെയെ റയലിലെത്തിക്കാൻ വലിയ ശ്രമങ്ങൾ നടത്തിയിരുന്ന റയൽ മാഡ്രിഡ് മാനേജ്മെന്റ് ഇപ്പോഴും താരത്തിനെ ടീമിലെത്തിക്കാനുള്ള ശ്രമങ്ങൾ ഉപേക്ഷിച്ചിട്ടില്ല എന്നാണ് പുറത്ത് വരുന്ന റിപ്പോർട്ടുകൾ.
എന്നാലിപ്പോൾ എംബാപ്പെയും റയൽ മാഡ്രിഡ് ആരാധകരും തമ്മിലുള്ള രസകരമായ ഒരു വീഡിയോ സമൂഹമാധ്യമങ്ങളിൽ തരംഗമായിരിക്കുകയാണ്. എംബാപ്പെ ഖത്തറിലെ തന്റെ ആരാധകർക്ക് ഫോട്ടോസും ഓട്ടോഗ്രാഫും നൽകവെ റയൽ മാഡ്രിഡിന്റെ ഒരു ആരാധകൻ അദ്ദേഹത്തോട് റയലിലേക്ക് വരൂ എന്ന് ആവർത്തിച്ച് ആവശ്യപ്പെട്ടിരുന്നു.
അപ്പോൾ ആരാധകന് മറുപടിയായി എംബാപ്പെ തംപ്സ് അപ്പ് ചിഹ്നം കാണിക്കുകയും തലയാട്ടുകയും ചെയ്യുന്നത് വീഡിയോയിൽ കാണാം. ഈ വീഡിയോ പുറത്ത് വന്നതിന് പിന്നാലെ സമൂഹ മാധ്യമങ്ങളിൽ വീഡിയോ ഷെയർ ചെയ്ത് ആഘോഷിക്കുകയാണ് ഒരു വിഭാഗം ആരാധകർ.
റയലിന്റെ സിസ്റ്റത്തിൽ താരത്തിന് കൂടുതൽ മികവോടെ കളിക്കാമെന്നും, ചാമ്പ്യൻസ് ലീഗ് പോലുള്ള മേജർ ടൈറ്റിലുകൾ വളരെ എളുപ്പത്തിൽ സ്വന്തമാക്കാമെന്നുമാണ് എംബാപ്പെ ആരാധകർ സമൂഹ മാധ്യമങ്ങളിലൂടെ അഭിപ്രായപ്പെടുന്നത്.
നേരത്തെ റയലിൽ താൻ തുടരണമെങ്കിൽ തന്റെ മൂന്ന് ആവശ്യങ്ങൾ അംഗീകരിക്കണമെന്ന് എംബാപ്പെ ക്ലബ്ബ് അധികൃതരോട് ആവശ്യപ്പെട്ടതായി നേരത്തെ റിപ്പോർട്ടുകൾ പുറത്ത് വന്നിരുന്നു.
നെയ്മറെ വിൽക്കണം, ഹാരി കെയ്നെ ക്ലബ്ബിലേക്ക് കൊണ്ട് വരണം, സിദാനെ പരിശീലക സ്ഥാനത്തേക്കെത്തിക്കണം എന്നിവയായിരുന്നു എംബാപ്പെയുടെ ആവശ്യങ്ങൾ എന്നായിരുന്നു റിപ്പോർട്ടുകൾ.
അതേസമയം സൗദി ഓൾ സ്റ്റാർസിനെതിരെയുള്ള മത്സരം വിജയിച്ചതിന് ശേഷം ഫ്രഞ്ച് കപ്പ് ടൂർണമെന്റിൽ പായിസ് ഡെ കാസൽ ക്ലബ്ബിനെയാണ് പി.എസ്.ജി അടുത്തതായി നേരിടുക. ലീഗ് വണ്ണിൽ തങ്ങളെ മുമ്പ് സമനിലയിൽ തളച്ച റെയിംസിനെയാണ് പി.എസ്.ജി അടുത്തതായി നേരിടുക.
Content Highlights:Fans say Mbappe come to Real Madrid; the player says okay; The video went viral