ഈയടുത്ത കാലത്തായി ഇന്ത്യന്‍ ക്രിക്കറ്റ് ആരാധകര്‍ക്കിടയില്‍ ഏറെ ഫാന്‍ ബേസ് ഉണ്ടാക്കിയെടുത്ത താരമായിരുന്നു രാജസ്ഥാന്‍ റോയല്‍സിന്റെ ക്യാപ്റ്റന്‍ സഞ്ജു സാംസണ്‍. ഒരു സമയത്ത് മലയാളികള്‍ മാത്രം ഇഷ്ടപ്പെട്ടിരുന്ന താരത്തിന് ഇപ്പോള്‍ ഇന്ത്യ മുഴുവന്‍ ആരാധകരുണ്ട്.
കാലങ്ങള്‍ക്ക് ശേഷം ഇന്ത്യന്‍ ജേഴ്‌സിയില്‍ തിരിച്ചെത്തിയ സഞ്ജു, തനിക്ക് ലഭിച്ച അവസരം കൃത്യമായി വിനിയോഗിച്ചിരുന്നു. ദീപക് ഹൂഡയുമൊത്ത് ടി-20യില്‍ ഇന്ത്യയുടെ എക്കാലത്തേയും മികച്ച കൂട്ടുകെട്ടുണ്ടാക്കിയായിരുന്നു സഞ്ജു കഴിവ് തെളിയിച്ചത്.
എന്നാല്‍, മികച്ച പ്രകടനം പുറത്തെടുത്തതിന് ശേഷവും ബി.സി.സി.ഐ താരത്തിന് ടീമില്‍ അവസരം നല്‍കാതെ വന്നതോടെയാണ് ഇന്ത്യന്‍ ക്രിക്കറ്റ് ആരാധകര്‍ സടകുടഞ്ഞെഴുന്നേറ്റത്.
ആദ്യകാലങ്ങളില്‍ മലയാളികളുടെ സോഷ്യല്‍ മീഡിയ പേജുകളില്‍ മാത്രം ഒതുങ്ങി നിന്ന പ്രതിഷേധം ഇന്ത്യയൊട്ടാകെ ആഞ്ഞടിച്ചിരുന്നു. #JusticeForSanjuSamson എന്ന ഹാഷ്ടാഗ് സമൂഹമാധ്യമങ്ങില്‍ ട്രെന്റിങ്ങായിരുന്നു.
ബി.സി.സി.ഐയുടെ പൊളിറ്റിക്‌സിന്റെ ഭാഗമായിട്ടാണ് ടീം സഞ്ജുവിനെ തഴയുന്നതെന്നും അയാള്‍ക്ക് ടീമില്‍ അവസരം നല്‍കണമെന്നും ആവശ്യപ്പെട്ടുകൊണ്ടായിരുന്നു അവര്‍ പ്രതിഷേധവുമായി രംഗത്തെത്തിയത്.
ഇപ്പോഴിതാ, ആരാധകരുടെ മനസില്‍ സഞ്ജു എത്രത്തോളമുണ്ടെന്ന് വ്യക്തമാക്കുന്ന ഒരു വീഡിയോ ആണ് സമൂഹ മാധ്യമങ്ങളില്‍ തരംഗമാവുന്നത്. സഞ്ജുവിന്റെ ഭീമന്‍ ഛായാചിത്രം വരച്ചുകൊണ്ടാണ് ആരാധകര്‍ തങ്ങളുടെ സ്‌നേഹം വ്യക്തമാക്കിയത്.
ആരാണ് ചിത്രം വരച്ചതെന്നോ, എവിടെയാണ് ചിത്രമുള്ളതെന്നോ തുടങ്ങിയ കാര്യങ്ങളൊന്നും തന്നെ വ്യക്തമല്ല.
രാജസ്ഥാന്‍ റോയല്‍സിന്റെ ഒഫീഷ്യല്‍ ട്വിറ്റര്‍ ഹാന്‍ഡിലില്‍ വീഡിയോ പങ്കുവെച്ചിട്ടുണ്ട്. ‘വിത്ത് ലവ്, ഫോര്‍ സഞ്ജു’ എന്ന ക്യാപ്ഷനോടെയാണ് വീഡിയോ പോസ്റ്റ് ചെയ്തിരിക്കുന്നത്.
മഹി ബിഷ്ണോയ് (സഞ്ജു സാസംസണ്‍ ഫാന്‍) എന്ന അക്കൗണ്ടില്‍ നിന്നുമാണ് രാജസ്ഥാന്‍ റോയല്‍സ് വീഡിയോ എടുത്തിട്ടുള്ളത്. കഴിഞ്ഞ ദിവസമാണ് ബിഷ്‌ണോയിയുടെ വാളില്‍ ഈ വീഡിയോ പോസ്റ്റ് ചെയ്തിട്ടുള്ളത്.
താനൊരു വലിയ സഞ്ജു സാംസണ്‍ ആരാധകനാണെന്നാണ് ബിഷ്‌ണോയിയുടെ ട്വിറ്റര്‍ ഹാന്‍ഡിലില്‍ കുറിച്ചിരിക്കുന്നത്.
ഇന്ത്യയുടെ വെസ്റ്റ് ഇന്‍ഡീസ് പര്യടനത്തിലാണ് സഞ്ജുവിപ്പോള്‍. കാലങ്ങള്‍ക്ക് ശേഷമാണ് താരം ഏകദിന ജേഴ്‌സിയിലേക്ക് മടങ്ങിയെത്തിയിരിക്കുന്നത്.
ജൂലൈ 22ന് ആരംഭിക്കുന്ന പര്യടത്തില്‍ മൂന്ന് ഏകദിനവും അഞ്ച് ടി-20യുമാണുള്ളത്. ഏകദിന ടീമില്‍ മാത്രമാണ് സഞ്ജു ഉള്‍പ്പെട്ടിരിക്കുന്നത്.
ജൂലൈ 22, ജൂലൈ 24, ജൂലൈ 27 എന്നീ ദിവസങ്ങളിലാണ് ഏകദിന മത്സരങ്ങള്‍ ഷെഡ്യൂള്‍ ചെയ്തിരിക്കുന്നത്
