കോഴിക്കോട്: കഴിഞ്ഞ ദിവസം ബി.ജെ.പിയില്‍ ചേര്‍ന്ന കോഴിക്കോട് മുന്‍ മേയര്‍ യു.ടി രാജന്‍ സി.പി.ഐ.എമ്മുകാരനാണെന്ന തരത്തില്‍ സോഷ്യല്‍ മീഡിയയില്‍ വ്യാജപ്രചരണം. ആദ്യം കോണ്‍ഗ്രസിലും പിന്നീട് കോണ്‍ഗ്രസ് എസിലും എന്‍.സി.പിയിലും ഉണ്ടായിരുന്ന യു.ടി രാജന്‍ ഒരിക്കലും സി.പി.ഐ.എമ്മില്‍ പ്രവര്‍ത്തിച്ചിരുന്നില്ലെന്ന വസ്തുത മറച്ചുവെച്ചാണ് പ്രചരണം.
1990 ല്‍ ഇടതുമുന്നണിയ്ക്ക് കോര്‍പ്പറേഷന്‍ ഭരണം ലഭിച്ച സമയത്തുണ്ടാക്കിയ ധാരണപ്രകാരം ഘടകകക്ഷി അംഗമെന്ന നിലയില്‍ യു.ടി രാജന്‍ ഒരു വര്‍ഷം മേയറായിരുന്നു. ഇതിനെ മുന്‍നിര്‍ത്തിയാണ് സി.പി.ഐ.എം ലീഡറും മുന്‍ മേയറുമായ യു.ടി രാജന്‍ ബി.ജെ.പിയില്‍ എന്ന് പറഞ്ഞ് ഫേസ്ബുക്കില്‍ വ്യാജപ്രചരണം.
എന്നാല്‍ യു.ടി രാജന്‍ ഒരുകാലത്തും സി.പി.ഐ.എമ്മുമായി സഹകരിച്ച് പ്രവര്‍ത്തിച്ചിരുന്നതായി അറിയില്ലെന്ന് കോഴിക്കോട് മുന്‍ മേയറും സി.പി.ഐ നേതാവുമായ രാജഗോപാലന്‍ ഡൂള്‍ന്യൂസിനോട് പറഞ്ഞു.
‘അയാള് സി.പി.ഐ.എം നേതാവൊന്നുമല്ല, കോണ്‍ഗ്രസ്.എസായിരുന്നു. ഇടതുപക്ഷത്തില്‍ നമ്മളുടെ കൂടെ 1990 മേയറായിട്ട് ഉണ്ടായിരുന്നു. ആദ്യത്തെ വര്‍ഷം ഹൈമാവതി തായാട്ട്, രണ്ടാമത്തെ വര്‍ഷം മുഹ്‌സിന്‍ മൂന്നാമത്തെ വര്‍ഷം യു.ടി രാജന്‍, നാലാമത്തെ വര്‍ഷം ഞാന്‍ അഞ്ചാമത്തെ വര്‍ഷം ടി.പി ദാസന്‍ എന്നിങ്ങനെയായിരുന്നു ധാരണ. ആദ്യത്തെ വര്‍ഷവും അവസാനത്തെ വര്‍ഷവും സി.പി.ഐ.എമ്മിന് ബാക്കി വര്‍ഷം ഘടകകക്ഷികള്‍ക്ക് എന്നിങ്ങനെയായിരുന്ന ധാരണ.’
