ബാലണ്‍ ഡി ഓര്‍ ആര് നേടുമെന്നതൊക്കെ പിന്നീടുള്ള കാര്യമാണ്, അദ്ദേഹമാണ് ലോകത്തിലെ ഏറ്റവും മികച്ച താരം; മുന്‍ എ.എസ് റോമ കോച്ച്
സ്പോര്‍ട്സ് ഡെസ്‌ക്
Monday, 26th June 2023, 8:32 pm
ലോക ഫുട്‌ബോളില്‍ ഏറ്റവും മികച്ച താരം ലയണല്‍ മെസിയെന്ന് മുന്‍ എ.എസ് റോമ കോച്ച് ഫാബിയോ കാപെല്ലോ. പ്രത്യേക കഴിവുകളുള്ള താരമാണ് മെസിയെന്നും മറ്റുള്ളവരില്‍ നിന്ന് വ്യത്യസ്തമായ സ്‌കില്ലുകള്‍ താരത്തിനുണ്ടെന്ന് അദ്ദേഹം കാട്ടിത്തന്നിട്ടുണ്ടെന്നും കാപെല്ലോ പറഞ്ഞു. ലാറ്റിന്‍ അമേരിക്കന്‍ മീഡിയ ഔട്ട്‌ലെറ്റായ ബിറ്റ്ബോളിനോട് സംസാരിക്കുകയായിരുന്നു അദ്ദേഹം.
‘താരങ്ങളില്‍ ആരെങ്കിലും ബാലണ്‍ ഡി ഓര്‍ നേടുമായിരിക്കും എന്നാല്‍ ക്രിസ്റ്റ്യാനോ റൊണാള്‍ഡോയാണോ മെസിയാണോ മികച്ചതെന്ന് ചോദിച്ചാല്‍ ഞാന്‍ അര്‍ജന്റൈന്‍ സ്ട്രൈക്കറുടെ പേര് പറയും. മെസി പ്രതിഭയാണ്, കാരണം, കളത്തില്‍ അദ്ദേഹത്തിന്റെ നിലവാരവും വേഗതയും മറ്റുള്ളവര്‍ക്ക് ചിന്തിക്കാന്‍ കഴിയുന്നതിലും അപ്പുറമാണ്,’ കാപെല്ലോ പറഞ്ഞു.
