ബെംഗളൂരു: കര്‍ണാടകത്തിലെ എക്‌സിറ്റ് പോള്‍ ഫലങ്ങള്‍ ബി.ജെ.പിക്ക് അനുകൂലം. 15 നിയമസഭാ സീറ്റുകളിലേക്കു നടന്ന ഉപതെരഞ്ഞെടുപ്പില്‍ ബി.ജെ.പി കൂടുതല്‍ സീറ്റുകള്‍ നേടുമെന്നാണ് ഇതുവരെ പുറത്തുവന്ന എക്‌സിറ്റ് പോള്‍ ഫലങ്ങളെല്ലാം പ്രവചിക്കുന്നത്. ആറ് സീറ്റുകളാണ് ബി.ജെ.പിക്കു സംസ്ഥാനത്തു ഭരണം നിലനിര്‍ത്താന്‍ വേണ്ടത്.
ഒമ്പതു മുതല്‍ 12 സീറ്റുകള്‍ വരെ ബി.ജെ.പി നേടുമെന്നാണ് സീ വോട്ടര്‍ സര്‍വേ പ്രവചിക്കുന്നത്. കോണ്‍ഗ്രസിന് 3-6 സീറ്റുകള്‍ മാത്രമേ ലഭിക്കൂവെന്നും ജെ.ഡി.എസ് അതിലും താഴെപ്പോകുമെന്നും ഒരു സീറ്റ് മാത്രമേ ലഭിക്കൂവെന്നും പ്രവചിക്കുന്നു.
സീ വോട്ടര്‍ക്കു പുറമേ ഇതുവരെ പുറത്തുവന്നത് പ്രാദേശിക ചാനലുകളുടെ എക്‌സിറ്റ് പോള്‍ ഫലങ്ങളാണ്. ബി.ജെ.പിയുടെ മുന്നേറ്റം അവരും പ്രവചിക്കുമ്പോള്‍, തകര്‍ന്നടിയുന്നത് ജെ.ഡി.എസാണെന്നാണു കണക്കുകള്‍ സൂചിപ്പിക്കുന്നത്.
ബി.ജെ.പി ഒമ്പത് സീറ്റുകള്‍ നേടുമെന്നാണ് ബി ടി.വി പ്രവചിക്കുന്നത്. കോണ്‍ഗ്രസ് മൂന്നും ജെ.ഡി.എസ് രണ്ടും സീറ്റുകള്‍ നേടുമെന്നും അവര്‍ പറയുന്നു.
