സൂര്യ നായകനായെത്തുന്ന പുതിയ ചിത്രം ‘എതിര്‍ക്കും തുനിന്തവനി’ലെ തീം പുറത്ത് വിട്ട് അണിയറപ്രവര്‍ത്തകര്‍. പതിനാറ് മിനിട്ട് പത്ത് സെക്കന്റ് നീളുന്ന വീഡിയോയില്‍ ചിത്രത്തിലെ ഏഴ് തീമുകളാണ് ഉള്‍പ്പെടുത്തിയിരിക്കുന്നത്.
നേരത്തെ പുറത്ത് വന്ന ഗാനത്തിന്റെ ലിറിക്കല്‍ വീഡിയോകള്‍ ശ്രദ്ധ നേടിയിരുന്നു.
അര്‍മാന്‍ മാലിക്കും നിഖിത ഗാന്ധിയും ചേര്‍ന്ന് പാടിയ ‘സുമ്മാ സുറന്ന്’ എന്ന ഗാനം എഴുതിയത് ശിവകാര്‍ത്തികേയന്‍ ആയിരുന്നു. ഡി. ഇമ്മന്‍ ആണ് സംഗീത സംവിധാനം.
നേരത്തെ പുറത്ത് വിട്ട ‘വാടാ തമ്പി’ എന്ന ഗാനത്തിന്റെ ലിറിക്കല്‍ വീഡിയോയും ശ്രദ്ധ നേടിയിരുന്നു. യുവ സംഗീതസംവിധായകരായ ജി.വി. പ്രകാശും അനിരുദ്ധ് രവിചന്ദറും ചേര്‍ന്ന് പാടിയ ഗാനത്തിന്റെ വരികളെഴുതിയത് സംവിധായകന്‍ വിഗ്നേഷ് ശിവനാണ്.
പ്രിയങ്ക മോഹന്‍ നായികയായെത്തുന്ന ചിത്രത്തില്‍ റെഡിന്‍ കിംഗ്സ്ലേ, സത്യരാജ്, വിനയ് റായി, ശരണ്യ പൊന്‍വണ്ണന്‍, സൂരി, എം.എസ് ഭാസ്‌കര്‍ എന്നിവര്‍ മറ്റ് കഥാപാത്രങ്ങളെ അവതരിപ്പിക്കുന്നു.
ചിത്രം അഞ്ച് ഭാഷകളില്‍ പുറത്തിറങ്ങുമെന്ന് നേരത്തെ അറിയിച്ചിരിക്കുന്നു. തമിഴിനു പുറമേ മലയാളം, തെലുങ്ക്, കന്നഡ, ഹിന്ദി ഭാഷകളിലായിരിക്കും ചിത്രം എത്തുന്നത്. സൂര്യയുടെ നാല്‍പതാമത്തെ ചിത്രമാണ് എതിര്‍ക്കും തുനിന്തവന്‍.
