തിരുവന്തപുരം: കേരളത്തിലെ ഏറ്റവും വൃത്തിയുള്ള റെയില്‍വേ സ്റ്റേഷനായി എറണാകുളം സൗത്ത് തെരഞ്ഞെടുക്കപ്പെട്ടു. റെയില്‍വേ കാറ്ററിംഗ് ആന്‍ഡ് ടൂറിസം കോര്‍പ്പറേഷന്‍ നടത്തിയ മൂന്നാമത്തെ അഖിലേന്ത്യ സര്‍വേയിലാണ് എറണാകുളം സൗത്ത് എ-വണ്‍ വിഭാഗത്തില്‍ ഒന്നാം സ്ഥാനത്ത് എത്തിയത്. അഖിലേന്ത്യ അടിസ്ഥാനത്തില്‍ ഇരുപതാം സ്ഥാനത്താണ് എറണാകുളത്തിന്റെ സ്ഥാനം.
അഖിലേന്ത്യ അടിസ്ഥാനത്തില്‍ എറണാകുളത്തിന് ശേഷം ഇടം നേടിയിട്ടുള്ളത് കോഴിക്കോട് റെയില്‍വേസ്റ്റേഷനാണ്. സംസ്ഥാനത്ത് ഏറ്റവും വൃത്തിയുള്ള രണ്ടാമത്തെ റെയില്‍വേ സ്റ്റേഷനാണ് ഇത്.
ദേശീയ തലത്തില്‍ 43-ാം സ്ഥാനത്തുള്ള തിരുവനന്തപുരം സെന്‍ട്രലാണ് ഏറ്റവും വൃത്തി കുറഞ്ഞ റെയില്‍വേ സ്റ്റേഷന്‍.
സംസ്ഥാനത്തെ നാല് റെയില്‍വേ സ്റ്റേഷനുകള്‍ക്ക് മാത്രമാണ് എ-വണ്‍ വിഭാഗത്തില്‍ സ്ഥാനം നേടാനായത്. യാത്ര ടിക്കറ്റുകളില്‍ നിന്ന് മാത്രം വര്‍ഷം അമ്പത് കോടിയിലേറെ വരുമാനം ലഭിക്കുന്ന സ്റ്റേഷനുകള്ക്കാണ് എ-വണ്‍ പദവി ലഭിക്കുന്നത്.
അഖിലേന്ത്യ തലത്തില്‍ 75 സ്റ്റേഷനുകള്‍ ഉള്‍പ്പെട്ട എ-വണ്‍ വിഭാഗത്തില്‍ ആദ്യ ഒന്നും രണ്ടും സ്ഥാനങ്ങള്‍ രാജസ്ഥാനിലെ ജോധ്പൂര്‍ , ജയ്പൂര്‍ എന്നീ റെയില്‍വേ സ്റ്റേഷനുകള്ക്കാണ്.